Epidemia kineze e koronavirusit ka ngjallur frikë për një pandemi globale dhe i ka shtyrë diplomatët e Pekinit në një përpjekje për të parandaluar vendet e tjera të marrin masa që nënkuptojnë mangësi në përpjekjet kineze për të kontrolluar krizën.
Teksa Presidenti Kinez Xi Jinping siguroi homologët e huaj se qeveria e tij nuk po kursen asnjë përpjekje për një “luftë të popullit” kundër një epidemie që ka vrarë më shumë se 1.380 njerëz, ministri i jashtëm kinez ka këmbëngulur fort për të transmetuar një mesazh qetësie dhe besim ndaj homologëve dhe zyrtarëve të vjetër nga më shumë se 20 vende.
Në Pekin dhe gjetkë, diplomatët kinezë e kanë konsideruar krizën si një provë miqësie, duke u bërë thirrje qeverive të huaja të mos pezullojnë linjat e udhëtimit me Kinën ose të evakuojnë qytetarët e tyre – duke i kosnideruar këto masa si të panevojshme, jo miqësore dhe që shkaktojnë frikë.
“Miqësia e vërtetë shfaqet në kohë fatkeqësish,” ka përsëritur zëdhënësi i Ministrisë së Jashtme Hua Chunying javët e fundit.
Në përgjithësi nuk ka funksionuar. Tre nga linjat ajrore më të mëdha amerikane — American Airlines, Delta Air Lines dhe United Airlines — kanë pezulluar fluturimet e pasagjerëve midis dy vendeve, siç kanë bërë edhe linjat kombëtare të Francës, Britanisë, Egjiptit, Katarit dhe Vietnamit, etj. Më shumë se një duzinë vendesh kanë rritur kufizimet për hyrjen e shtetasve kinezë ose njerëzit që kanë qenë kohët e fundit në Kinë.
Mbyllja e kufijve
Të paktën 54 juridiksione ose kanë mbyllur kufijtë ose kanë vendosur kufizime për shtetasit kinezë dhe udhëtarët nga Kina kontinentale.
“Ende ka paqartësi të konsiderueshme për numrin e rasteve të mundshme dhe shkallën e vdekshmërisë së virusit,” tha Ryan Manuel, drejtor menaxhues i firmës kërkimore zyrtare me bazë në Hong Kong dhe një ekspert në sistemin e shëndetit publik të vendit.
“Është më e lehtë të mbyllësh kufijtë sesa të llogaritësh një përgjigje bazuar në këshilla epidemiologjike.”
Ditët e fundit, Ministria e Jashtme e Kinës thirri diplomatët prej një numër ambasadash aziatike dhe perëndimore në Pekin për t’u ankuar për përgjigjet e qeverive të tyre ndaj epidemisë, të cilat kanë përfshirë ndalimin e fluturimeve dhe lëshimin e paralajmërimeve kundër udhëtimit në Kinë, thanë burime pranë ministrisë.
Në këto takime, si dhe me homologët e tjerë të huaj, diplomatët kinezë kanë përsëritur udhëzimet e Organizatës Botërore të Shëndetit si përgjigje të politikave ndaj epidemisë, ku këshillohet të mos ketë kufizime në udhëtimet ndërkombëtare.
Në një takim javën e kaluar, Ministri i Jashtëm kinez Wang Yi u tha vartësve të vjetër se Ministria e Jashtme “duhet të udhëzojë vendet e ndryshme për të vlerësuar situatën e epidemisë në mënyrë objektive dhe të drejtë, dhe t’i përgjigjet me qetësi dhe saktë situatës”, tha ministria.
Megjithë dëshirat e Pekinit, një numër vendesh – përfshirë qeveritë që Kina i konsideron si partnere të ngushta – i kanë vendosur embargo.
Koreja e Veriut, qeveria e izoluar e së cilës llogarit Pekinin si një aleat jetik, ishte vendi i parë që mbylli kufirin e saj me Kinën në janar. Rusia, një mik tjetër, mbylli kufijtë tokësor me Kinën dhe pezulloi udhëtimin pa viza midis dy vendeve.
Irani ndërpreu tranzitin ajror me Kinën, ndërsa Singapori nuk u jep viza shtetasve kinezë duke u bashkuar me më shumë se një duzinë vendesh të tjera në evakuimin e qytetarëve nga qyteti qendror kinez Ëuhan, qendra e shpërthimit të koronavirusit.
Pakistani pezulloi për pak fluturimet drejt dhe nga Kina, duke rifilluar ato menjëherë pasi Ministria e Jashtme kineze publikoi një telefonatë midis ministrave të jashtëm të dy vendeve në një deklaratë të titulluar: “Pakistani qëndron në mënyrë të vendosur me vëllezërit kinezë në këto kohë të vështira”.
Pekini ka rezervuar barrën e kritikës së saj për SHBA-të dhe qeveritë e tjera perëndimore. Zyrtarët kinezë kanë akuzuar publikisht dhe në mënyrë të përsëritur Uashingtonin se është jomiqësore dhe madje antagoniste që kanë ndërmarrë hapa për të mbyllur konsullatën në Wuhan, dhe për ngritjen e alarmit të udhëtimit në Kinë e nga Kina drejt vendeve të tyre nivelin më të lartë – “Mos Udhëto” – një paralele me Sirinë, Irakun dhe Afganistanin.
Zyrtarët kinezë “me gjasë po përgjigjen ndaj asaj që ata e perceptojnë si insinuatë nga qeveritë e huaja që sistemi i tyre nuk mund të merret me sfidat e tanishme,” tha Natasha Kassam, një studiuese në Institutin Lowy në Sidnei dhe një ish-diplomate australiane.
“Makina e propagandës ka tendencë të përqendrohet në kritikat e huaja si municion, por kjo ka të bëjë kryesisht me kundërshtimin e kontrollit popullor në shtëpi,” shtoi ajo.
Disa kritikë kanë akuzuar Pekinin për hipokrizi, duke treguar trajtimin e tij ndaj qytetarëve meksikanë gjatë një pandemie H1N1, ose gripit të derrave, në vitin 2009.
Në atë kohë, Kina detyroi Meksikanët të qëndronin brenda kufijve të saj të karantinës, u pezulluan fluturimet për në Meksikë dhe u ndalua lëshimi i vizave për Meksikanët. Masat që qeveria e Meksikës do ti denonconte si diskriminuese dhe të pabazuara.
“Kina kurrë nuk e pranoi se kishte gabuar, ose të kërkonte falje,” shkruajti në Twitter këtë muaj Jorge Guajardo, ambasadori i atëhershëm i Meksikës në Kinë. /WSJ
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
