Donald Trump ka kërcënuar Britaninë e Madhe se, me shumë gjasë “nuk do të arrijë” një pakt tregtie me Shtetet e Bashkuara, nëse plani i kryeministres Theresa May për “Brexit”-in do të përparojë.
Sipas asaj që ka deklaruar për “The Sun”, plani i kryeministres britanike “ndoshta do ta vriste një marrëveshje”, pasi kjo do të nënkuptonte që Shteteve të Bashkuara “u duhet të merren me Bashkimin Europian”, në vend që të merren vetëm me Britaninë.
Ndaj deklaratave të Trumpit nuk ka pasur asnjë reagim nga “Doëning Street”.
Theresa May është përpjekur të diskutojë një marrëveshje tregtie të lirë me Shtetet e Bashkuara, në ndalesën e parë të presidentit amerikan Trump në Britani, duke u shprehur se “Brexit” ishte një “mundësi” për të krijuar rritje ekonomike për të dyja vendet.
Por, si për të theksuar kundërshtinë e tij ndaj planit të Mayt, Trump deklaroi gjithashtu se ish-Sekretari i Jashtëm britanik, Boris Johnson do të ishte një “kryeministër i madh”, duke shtuar se “ai ka gjithçka i nevojitet”.
Në intervistën e tij për tabloidin britanik, ai risolli në vëmendje kritikat ndaj kryebashkiakut të Londrës, Sadiq Khan, për sulmet terroriste të vitit të kaluar në kryeqytet, duke thënë se ai ka bërë “një punë të tmerrshme”.
Presidenti dhe bashkëshortja e tij u pritën me një ceremoni tapeti të kuq në pallatin “Blenheim”, në Oxfordshire”, pasditen e së enjtes. Ata ishin duke darkuar me Mayn kur doli lajmi për intervistën e tij me gazetën britanike, e cila – sipas tij, – ishte bërë teksa gjendej në Bruksel.
Pas publikimit të saj, zëdhënësja e Shtëpisë së Bardhë, Sarah Sanders tha se presidenti “pëlqen dhe respekton së tepërmi kryeministren May”, duke shtuar se “kurrë nuk ka thënë ndonjë gjë të keqe për të”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
