Mentor Kasa - Kryeministri Edi Rama hoqi atletet me të cilat u shfaq në Pragë në samitin e katër vendeve të Vishegradit me vendet e Ballkanit Perëndimor dhe veshi këpucët në takimin me Kancelaren Angela Merkel në Berlin.
Me mision bindjen e Gjermanisë se Shqipëria meriton hapjen e negociatave në tetor, Rama hyri në këtë takim me një libër me piktura në vend të dosjes së integrimit dhe progresit të vendit. Takimi zgjati rreth 50 minuta dhe në fund të tij, bashkë me arsyet se përse duheshin hapur negociatat me vendin tonë, Merkel mori dhuratë edhe librin në fjalë.
Dhurata është pranuar me kënaqësi nga Kancelarja gjermane, por mbetet e paqartë nëse argumentet e dhëna nga Kryeministri Edi Rama për hapjen e negociatave janë pranuar me të njëjtën kënaqësi apo jo.
Në përfundim të takimit, Kryeministri ka shpërndarë në rrjetet sociale videon ku Merkel e buzëqeshur e përcjell. Videoja shoqërohet me një shënim të shkurtër të Kryeministrit, ku çuditërisht mungon fjala “negociatë”, edhe pse negociatat ishin misioni i Ramës në Berlin. “Shumë i inkurajuar nga vlerësimet dhe predispozita pozitive ndaj Shqipërisë e kancelares Merkel”, shkruan Rama.
Më shumë se me fjalë, takimin me Merkel, Kryeministri shqiptar zgjodhi që ta rrëfejë me foto. Pak pasi kishte publikuar videot e hyrjes dhe daljes nga takimi me Kancelaren gjermane, Rama publikon një fotogaleri nga momentet e këtij takimi.
Mes fotove janë edhe ato që tregojnë Kryeministrin teksa i dhuron Kancelares gjermane albumin me piktura personale. Albumi ka tërhequr vëmendjen e faqes zyrtare të qeverisë gjermane në Instagram.
Por a është e mjaftueshme dhurata që Rama i bëri Merkelit që Bundestagu gjerman të bindet se Shqipërisë i duhen hapur negociatat muajin e ardhshëm? Sinjalet nuk janë fort pozitive. Muajt e fundit, zërat pesimistë për negociatat me Shqipërinë janë shtuar ndjeshëm dhe kjo edhe falë ndihmës së dhënë nga kriza e gjatë politike në Tiranë.
Thelbi i të gjitha deklaratave të bëra nga deputetët gjermanë ka qenë një: kriza politike aktuale nuk ndihmon në përmirësimin e pozicionit të Shqipërisë sa i takon hapjes apo jo të negociatave të anëtarësimit në tetor.
A pati zgjedhje më 30 qershor?
Pranverën e 2018, Gunther Krichbaum kujtonte kushtet e vendosura që në fund të nëntorit të 2016-s, e të shqiptuara gjatë vizitës së një delegacioni të Bundestagut gjerman në Tiranë, të cilin e kryesonte për të siguruar një vendim pozitiv nga CDU/CSU për çeljen e negociatave.
Kushtet lidheshin me reformën në drejtësi, luftën kundër korrupsionit, sidomos në nivelet e larta, luftën kundër krimit të organizuar dhe të drogës dhe reformën zgjedhore sipas rekomandimeve të OSBE/ODIHR për zgjedhjet parlamentare të 2017-ës.
Reforma në drejtësi duket i vetmi kusht që mund të kënaqë Bundestagun gjerman, pavarësisht procesit të ngadaltë që po zbatohet, ndërsa për progresin në kriteret e tjera pakënaqësitë janë shprehur edhe publikisht nga deputetët dhe zyrtarët e tjerë gjermanë, që me gjuhën diplomatike kanë kërkuar “më shumë përpjekje në luftën kundër korrupsionit dhe krimit të organizuar”.
Sa i takon reformës zgjedhore, ajo mbetet në vendnumëro që prej vitit 2016 dhe sinjalet që kanë mbërritur dhe pritet që të mbërrijnë nga Berlini e bëjnë këtë reformë kryedetyrë për politikën shqiptare.
Por, si të mos mjaftonte dështimi me sukses në përmbylljen e reformës zgjedhore, politika shqiptare ja ka dalë mbanë që të ndezë një enigmë të madhe në kokën e deputetëve gjermanë. DW shkruan se deputetët gjermanë kërkojnë të sqarohen si ligjshmëria e zgjedhjeve vendore të 30 qershorit, ashtu edhe akuzat për shit-blerjen e votave në disa zona. Pra, gjermanët duan tëdijnë nëse më 30 qershor pati apo jo zgjedhje ligjërisht. Për këtë, një delegacion i kryesuar me gjasë nga Johann David Wadephul, kryetar i grupit parlamentar CDU/CSU pritet të mbërrijë në Tiranë javën e ardhshme.
Nga deklaratat dhe qëndrimet e shfaqura publikisht, pjesa më e madhe e deputetëve të CDU/CSU-së janë të prirur t'i japin Shqipërisë një "Po me kushte", ndërsa ka një pakicë të vogël, por të fortë sipas DW, që mendon se Shqipëria nuk është ende gati as për këtë.
Shkupit “Po”, Tiranës “Jo”!
Gjermania e justifikoi në qershor shtyrjen e vendimmarrjes për hapjen e negociatave të anëtarësimit me Shqipërinë dhe Maqedoninë e Veriut me arsye burokratike. Berlini zyrtar tha atëherë se koha nga shqyrtimi në Bundestag i raportit të progresit të Komisionit Europian deri në mbledhjen e Këshillit Europian për vendimmarrje ishte e pamjaftueshme.
Arsyeja u përdor për të argumentuar shtyrjen e shqyrtimit të progresraportit të Komisionit Europian për këtë shtator. Shqyrtimi nuk do të shtyhet më dhe nga java e ardhshme, deputetët gjermanë do të diskutojnë për hapjen e negociatave, ose jo me Shqipërinë dhe Maqedoninë.
I pari që hodhi idenë e ndarjes së Maqedonisë së Veriut nga Shqipëria në këtë proces ishte Kryeministri maqedonas, Zoran Zaev dhe më vonë Presidenti Stevo Pendarovski. Ky i fundit ishte më i drejtpërdrejtë kur tha se nuk kishte se përse të penalizohej vendi i tij për shkak të Shqipërisë. Në këtë periudhë kohore të ndërmjetme zërat që folën për një ndarje të Maqedonisë së Veriut nga Shqipëria u shtuan.
Me shtimin e këtyre zërave shtohej edhe reagimi i Kryeministrit Edi Rama në Tiranë. Në një intervistë për Euroneës gjatë pushimeve të verës, Rama paralajmëroi se një skenar i tillë rrezikon të destabilizojë Ballkanin.
Pavarësisht këtij paralajmërimi të Ramës, zërat për ndarje të Shqipërisë nga Maqedonia e Veriut nuk reshtën, deri tek i fundit që e sinjalizoi këtë, që ishte as më pak dhe as më shumë por vetë kreu i Komisionit për Çështjet Europiane në Bundestagun gjerman, Gunther Krichbaum, me të cilin Rama u takua gjatë qëndrimit në Berlin.
Maqedonia e Veriut si justifikim
Hapja e negociatave si për Shqipërinë, ashtu edhe për Maqedoninë e Veriut do të ishte vendimi ideal, megjithëse i vonuar. Por, në tryezë janë disa skenare, veç këti vendimi. Skenari i parë është ai që mund të shtyjë negociatat për të dyja vendet. Në këtë skenar, Brukselit do t’i duhej të përpiqej fort për të gjetur justifikime përballë presionit të Shkupit, po të kihet parasysh që në qershor, Zoran Zaev kërcënoi me dorëheqje nëse BE nuk hap negociatat me vendin e tij. Dorëheqja rrezikon të fusë Maqedoninë e Veriut në një periudhë delikate tranzicioni, që mund të shfrytëzohet nga aktorë të tretë jashtë BE-së për interesa të agjendave të tyre. Skenari tjetër është ai i ndarjes së dy vende, pra Shqipërisë t’i shtyhet sërish, ndërsa Maqedonisë së Veriut t’i jepet drita jeshile.
Nëse ndodh ky skenar, përgjegjësia e dështimit bie drejtpërdrejtë tek politika e Tiranës, për paaftësi në sigurimin e një progresi të qëndrueshëm dhe të mjaftueshëm për hapjen e negociatave. Nëse ndodh që BE të vendosë shtyrjen e negociatave për të dyja vendet, atëherë politika në Tiranë mund të fajësojë problemet e brendshme të vetë Bashkimit Europian dhe qëndrimet e disa vendeve anëtare të tij.
Vendet që votuan kundër hapjes së negociatave me Shqipërinë në mbledhjen e fundit të Këshillit ishin Franca dhe Holanda, të cilave mund t’u shtohet edhe Greqia në tetor. Franca e arsyetoi vendimin me nevojën për reformimin e brendshëm të BE-së, pastaj zgjerimi, Holanda ngriti shqetësimin e rritjes së kriminalitetit me burim shtetasit shqiptarë, ndërsa qeveria e re greke ka dhënë sinjale se do të vendosë veton për “diskriminimin”, sipas saj, që Qeveria shqiptare po i bën minoritetit grek në jug të vendit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.