.png)
Ministri i Jashtëm në detyrë, Gent Cakaj, tha se në Shqipëri janë 350 pasaporta diplomatike në kundërshtim me ligjin.
Në një deklaratë për mediat, ministri Cakaj u ka bërë thirrje deputetëve, gjyqtarëve të lartë që sipas tij nuk e kanë kaluar vetingun, deri te shoferët e personaliteteve, që t’i dorëzojnë ato pasaporta, në të kundërt do të shpallen të pavlefshme.
“Shqipëria ka dyfishin e pasaportave diplomatike krahasuar me vendet e rajonit. Ky është fakt real, në shkelje flagrante të ligjit, sot në Shqipëri ka më shumë se 350 persona që mbajnë pasaporta diplomatike në mospërputhje me ligjin.
Deputetëve, gjyqtarëve të lartë që s’e kanë kaluar ende vetingun dhe deri te shoferët e personaliteteve, u bëj thirrje që të dorëzojnë menjëherë pasaportën diplomatike në të kundërt ato do të bllokohen dhe do shpallen të pavlefshme”, ka thënë Cakaj.
Deklarata e Ministrit në Detyrë erdhi pas paralajmërimi të disa javëve më parë për ndryshimin e kritereve të marrjes së pasaportave diplomatike. Ministri i Jashtëm në Detyrë la të kuptohet se në këtë pjesë është abuzuar, duke bërë që pasaporta jonë diplomatike të vihet në pikëpyetje në shumë vende për shkak të kritereve të lëshimit.
Sikur të mos mjaftonte kjo, vendi ynë është përfshirë edhe në një skandal të vjedhjes së 100 pasaportave gjatë transportit të tyre me një autobus linje drejt Ambasadës shqiptar në Athinë. Ngjarja shkaktoi shumë reagime. Për ish-kryeministrin Sali Berisha, pasaportat shqiptare që u vodhën në Athinë janë në duart e ISIS-it dhe të mafies. “Ato mund të përdoren nga grupet më të rrezikshme terroriste të ISIS-it që po largohen nga Siria, por edhe nga baronët e drogës të Shqipërisë, Ballkanit dhe Amerikës Latine etj”, shkruante ish-kryeministri.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
