75% e përmbajtjes janë fruta të papërpunuara, dieta që nuk duhet të ndiqet

Dietat me bazë bimore janë bërë gjithnjë e më popullore vitet e fundit, si për arsye shëndetësore ashtu edhe për të qenë në formë të mirë fizike. Një formë ekstreme e një diete të bazuar në bimë është "fruitarianism", një dietë e bazuar kryesisht në konsumin e frutave të papërpunuara. Në pamje të parë, kjo mund të tingëllojë e shëndetshme, por çfarë efekti ka kjo lloj diete në trup? Dhe a është një zgjedhje e një diete të shëndetshme?

Studime të ndryshme kanë treguar se dietat me bazë bimore janë të mira për trupin. Ato mund të zvogëlojnë rrezikun e sëmundjeve të zemrës me 40 përqind dhe goditjen në tru me 29 përqind. Dietat me bazë bimore gjithashtu janë një strategji e dobishme për të ndihmuar njerëzit të humbin peshë dhe janë më të qëndrueshme se dietat e mishit.

Por frutarizmi është një lloj diete që nuk ka asnjë studim për të treguar se ka përfitime shëndetësore.

Nuk ka një përshkrim përfundimtar të asaj që duhet të përbëjë një dietë frutore, megjithëse një "rregull" i cituar zakonisht është se rreth 55 përqind dhe 75 përqind të dietës duhet të përmbajë fruta të papërpunuara. Pjesa tjetër mund të përfshijë drithëra, arra dhe vajra.

Bashkëthemeluesi i Apple, Steve Jobs, eksperimentoi me një dietë frutore, duke e plotësuar atë me arra, fara dhe drithëra. Disa dashamirës të frutarizmit i përmbahen një rregulli 80-10-10: 80 përqind e kalorive që vijnë nga frutat dhe perimet e freskëta, 10 përqind vijnë nga proteina dhe 10 përqind nga yndyra. Ato e ndjekin këtë rregull me idenë se “sistemi tretës i njeriut është i krijuar fiziologjikisht për të tretur fruta dhe perime të papërpunuara”.

Ndërsa kjo mund të ketë qenë dikur e vërtetë, trupi i njeriut ka evoluar.

Ka disa gjëra të rëndësishme të shëndetit fizik që duhen marrë parasysh kur njerëzit vendosin të nisin një dietë të bazuar në fruta. Ndjekja e këtij modeli të ngrënies përjashton grupet ushqimore thelbësore dhe lëndët ushqyese që i duhen trupit për të ruajtur shëndetin normal.

Ndërsa shumica e frutave konsiderohen të jenë e shëndetshme dhe ushqyese, një dietë që mbështetet vetëm në fruta do të jetë e mangët në lëndë ushqyese, duke përfshirë proteina, hekur, kalcium, vitaminë B (përfshirë vitaminën B12) dhe D, zink dhe acide yndyrore omega-3. Mungesa në këto lëndë ushqyese mund të shkaktojë rakit dhe osteomalaci (zbutje dhe dobësim të kockave), anemi dhe probleme me muskujt dhe lëkurën. E thënë thjesht, frutat nuk përmbajnë të gjitha lëndët ushqyese që i nevojiten trupit.

Plus, duhet të merren parasysh nivelet e larta të fruktozës në një dietë. Fruktoza është një sheqer i thjeshtë, si glukoza, por trupi i njeriut e përpunon atë shumë ndryshe. Fruktoza metabolizohet vetëm në mëlçi dhe konsumi i tepërt i saj mund të shkaktojë grumbullimin e yndyrës në mëlçi, duke çuar në rezistencë ndaj insulinës dhe sëmundje të mëlçisë yndyrore jo-alkoolike. Ndërsa ka polemika nëse fruktoza nga frutat është po aq e keqe sa shurupi i fruktozës, i cili i shtohet ushqimeve për t’i ëmbëlsuar ato, eksperimentet në minjtë që ushqeheshin me një dietë të lartë fruktoze treguan ngjashmëri me sëmundjen e mëlçisë yndyrore njerëzore.

Përtej efekteve të mundshme fizike të frutarizmit, dietat kufizuese gjithashtu shpesh shoqërohen me një çrregullim të ngrënies të njohur si orthorexia nervosa, ose një obsesion i pashëndetshëm për të ngrënë vetëm ushqim "të pastër". Kjo do të thotë se ajo që mund të fillojë si një lëvizje e shëndetshme drejt ngrënies së më shumë frutave dhe perimeve dhe më pak ushqim të përpunuar, mund të çojë në një çrregullim të ngrënies, depresion dhe ankth.

Nëpër botë janë raportuar edhe raste vdekje ose sëmundje të rënda kur është ndjekur një dietë e tillë.

Me pak dëshmi për përfitimet e një diete të tillë kufizuese, është e qartë se njerëzit që ndjekin këtë dietë kufizuese po vënë shëndetin e tyre në rrezik serioz. Plotësimi me ushqime që sigurojnë ushqyesit që mungojnë mund të ndihmojë, por mund të refuzohet nga fanatikët e frutarizmit. Para se të ndryshoni një dietë, veçanërisht nëse ndryshimi do të jetë ekstrem, është gjithmonë e këshillueshme që së pari të flisni me mjekun tuaj.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.