.png)
Nga Gazeta ‘SI’ – Qendra e Bashkëpunimit Ndërfetar në Elbasan ka reaguar me një deklaratë të fortë për shtyp, duke shprehur shqetësimin e thellë për gjendjen alarmante të ndotjes së ajrit në qytet.
Sipas tyre, situata është përkeqësuar ndjeshëm për shkak të mosfunksionimit të inceneratorit dhe zjarreve të përsëritura në landfillin e mbeturinave.
Në deklaratë theksohet se ndotja përbën një kërcënim serioz për shëndetin e banorëve dhe mjedisin përreth, ndërsa vihet në dukje mungesa e zgjidhjeve afatgjata për këtë problem që përsëritet çdo vit.
Qendra i bën thirrje Qeverisë së Shqipërisë të ndërmarrë me urgjencë ndërtimin e një inceneratori të ri, që të përmbushë standardet bashkëkohore dhe të garantojë mbrojtjen e shëndetit publik dhe mjedisit.
Në të njëjtën kohë, kërkohet nga organet e drejtësisë të hetojnë me prioritet abuzimet me fondet dhe menaxhimin e inceneratorit ekzistues, si dhe të nxirren para drejtësisë personat përgjegjës për keqadministrimin e kësaj çështjeje.
Qendra apelon për bashkëpunim të ngushtë mes institucioneve vendore dhe qendrore për të ofruar një zgjidhje të qëndrueshme dhe afatgjatë. Ajo shpreh mirënjohje për përpjekjet e deritanishme në shuarjen e zjarreve dhe stabilizimin e situatës.
Në përfundim, theksohet se mjedisi i pastër është një e drejtë e dhuruar nga Zoti për çdo qytetar dhe një detyrim moral për një shoqëri që synon zhvillim të qëndrueshëm dhe mirëqenie për të gjithë.
Deklarata e plotë
Qendra e Bashkëpunimit Ndërfetar kërkon zgjidhje të përhershme për situatën e inceneratorit në Elbasan.
Qendra e Bashkëpunimit Ndërfetar shpreh shqetësimin e thellë për situatën alarmante të ndotjes së ajrit në qytetin e Elbasanit, si pasojë e mosfunksionimit të inceneratorit ekzistues dhe shpërthimeve të përsëritura të zjarreve në landfill.
Kjo situatë përbën një rrezik serioz për shëndetin e qytetarëve dhe një kërcënim të vazhdueshëm për mjedisin dhe të ardhmen e brezave të rinj. Në këtë kuadër:
I bëjmë thirrje Qeverisë së Shqipërisë të ndërmarrë me urgjencë investimin për ndërtimin e një inceneratori të ri, sipas standardeve bashkëkohore, që garanton mbrojtjen e mjedisit dhe shëndetit publik.
U bëjmë thirrje organeve të drejtësisë të hetojnë me përparësi dhe të çojnë përpara drejtësisë të gjithë ata individë apo struktura që kanë abuzuar me fondet dhe menaxhimin e inceneratorit të mëparshëm, tashmë jashtë funksionit.
Kërkojmë nga institucionet vendore dhe kombëtare të bashkëpunojnë ngushtësisht për të ofruar një zgjidhje të qëndrueshme dhe afatgjatë për këtë problem që përsëritet çdo vit.
Ne falënderojmë institucionet përgjegjëse, lokale dhe qendrore, për përpjekjet e deritanishme në shuarjen e zjarreve dhe stabilizimin e situatës.
Qendra jonë beson se një mjedis i pastër, i krijuar nga Zoti, është një e drejtë themelore për çdo qytetar dhe një detyrim moral për çdo shoqëri që synon zhvillim të qëndrueshëm, drejtësi dhe mirëqenie për të gjithë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
