.png)
Gazeta Si - Për të tretën ditë me radhë janë mbyllur pa sukses kërkimet në ujërat e lumit Seman për zhdukjen misterioze të Mateo Likës dhe automjetit të tij.
Polumbarët e RENEA-s, bashkë me banorët e zonës, kanë kërkuar edhe këtë të martë për gjetjen e automjetit tip “Golf”, i cili dyshohet se ka rënë në ujërat e këtij lumi.
Mësohet se kërkimet e sotme kanë qenë më intensive dhe janë përdorur edhe mjete të sofistikuara për të bërë të mundur gjetjen e mjetit.
E gjithë rrjedha e lumit është këqyrur me dron, ndërsa ende nuk ka informacion se në cilat pista të hetimit do të fokusohet policia gjatë ditëve në vijim.
Policia e Fierit ka nisur hetimet në lidhje me ngjarjen, ku si pistë kryesore mbetet hipoteza nëse automjeti ka rënë apo jo në ujë. Në ujërat e lumit Seman po kërkohet edhe nga policia, por edhe nga polumbarët.
Në pyetje janë marrë familjarët e 26-vjeçarit, por deri tani asnjë nga deklarimet e tyre nuk e ka ndihmuar grupin hetimor për zbardhjen e ngjarjes.
Edhe telefoni i të riut mbetet i fikur, ndërkohë që të afërm të tij deklarojnë se Mateo Lika kishte pak muaj që ishte në Gjermani dhe se në Fier kishte ardhur 3 ditë përpara sesa të merrte makinën me qira.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
