Çështja e tenistes Peng Shuai ka trazuar botën e tenisit. WTA (Federata e Tenisit të Femrave) ka kërcënuar se do të anulojë çdo turne në Kinë, nëse nuk qartësohet kjo çështje. Peng Shuai, pasi akuzoi ish-zëvendëskryeministrin e Kinës, Zhang Gaoli, se e kishte dhunuar seksualisht, është zhdukur që prej datës 4 nëntor.
Ditët e fundit tenistja kineze i ka dërguar një letër WTA-së, ku i quante “false" akuzat për përdhunim dhe deklaronte se nuk ndihej në rrezik, por ishte në shtëpi duke pushuar. Federata profesioniste e tenisit të femrave në fat ka dyshime shumë të forta në lidhje me vërtetësinë e dokumentit, që mund të jetë dërguar nga dikush tjetër në emër të Peng Shuai.
“Jemi përgatitur plotësisht për të tërhequr aktivitetet tona dhe për të përballuar të gjitha pasojat, - ka pohuar Steve Simon, numri 1 i WTA-së për CNN. – Sepse akuzat për përdhunim janë më të rënda se çdo gjë tjetër".
Peng Shuai, ish-numri 1 në botë në tenisin në çift, akuzoi me një postim në rrjetet sociale ish-zëvendëskryeministrin kinez Zhang Gaoli, - që nga 2013-a në 2018-ën ka qenë një nga politikanët më të fuqishëm të Kinës, - se e kishte detyruar me forcë të kryente marrëdhënie seksuale. Kjo akuzë u publikua më 2 nëntor në llogarinë zyrtare në Weibo të tenistes. Më 4 nëntor Kina bllokoi çdo referim të këtij mesazhi dhe që atëherë nuk ka më asnjë lajm për tenisten.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.