.png)
Nga Gazeta 'Si'-Nga baza ushtarake gjermane e Ramstein, ku zhvilloi një vizitë, presidenti ukrainas Volodimir Zelenski u kërkoi aleatëve perëndimorë të ndërmarrin vendime më të forta.
Zelenski, i cili për herë të parë mori pjesë në një mbledhje të ministrave të Mbrojtjes së NATO, këmbëngul që ata të lejojnë Kievin të ndërmarrë sulme me raketa me rreze të gjatë kundër Rusisë, duke e sjellë paqen më afër.
Pas valës së shtuar të bombardimeve ruse javët e fundit, Kievi përsërit se ekziston nevojë urgjente për sisteme mbrojtje dhe kapacitete sulmi me rreze të gjatë.
“Na duhet të përdorim raketat me rreze të gjatë jo vetëm në territorin e pushtuar të Ukrainës por edhe në territorin rus, në mënyrë që Rusia të motivohet për të kërkuar paqen”, tha Zelenski.
Gjatë qëndrimit të Zelenskit në Gjermani, ku u takua edhe me kancelarin Olaf Scholz, Berlini i premtoi Kievit artileri shtesë, përfshirë 12 Howitzer. Megjithatë ministri i Mbrojtjes Boris Pistorius tha se vendi i tij vazhdonte të kundërshtonte mundësinë e përdorimit të armatimeve me rreze të gjatë në territorin rus. “Qëndrimi i Gjermanisë mbetet i pandryshuar”, tha Pistorius.
Sekretari Amerikan i Mbrojtjes Lloid Austin, që po ashtu ishte i pranishëm në takimin e grupit të kontaktit për Ukrainën në Gjermani, premtoi 250 milionë dollarë të tjera armatime për Kievin.
Ndërkohë, sekretari i Përgjithshëm i NATO-s, Jens Stoltenberg, nga Norvegjia, paralajmëroi Pekinin të ndalë mbështetjen për luftën ruse, duke thënë se diçka e tillë do të ndikonte në mënyrë të pakthyeshme tek interesat dhe reputacioni i Kinës
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
