Shtatë persona, mes të cilëve klientë dhe punonjës të një lokali në rrugën “Gjin Bue Shpata” në Tiranë, janë arrestuar, pasi janë kapur duke konsumuar lëndë narkotike të llojit kokainë. Ndërkohë pronari i këtij subjekti është shpallur në kërkim nga policia.
Operacioni është zhvilluar në një lokal, i cili qëndronte hapur dhe pas orës policore, për të cilin policia kishte informacione se shërbente si ambient për konsumin dhe shpërndarjen e drogës.
Në pranga kanë rënë menaxheri i lokalit Mariglen Salla 39 vjeç, për veprat penale “Prodhimi dhe shitja e narkotikëve”, dhe “Prishja e qetësisë publike”, Donald Cenaj 24 vjeç, Marjo Balliu 25 vjeç, Erjon Xheferri 23 vjeç, Leon Kadriu 20 vjeç, për veprën penale “Prodhim dhe shitje të narkotikëve”; Gridi Mihali 28 vjeç, për veprën penale “Prodhim dhe shitje të narkotikëve” dhe Barsel Halilaj 30 vjeç, për veprat penale “Kundërshtimi i punonjësit të policisë së rendit publik”, “Goditje për shkak të detyrës”, “Kanosja për shkak të detyrës” dhe “Mosbindja ndaj urdhrit të policisë së rendit publik”.
Ndërkohë në gjendje të lirë është proceduar një 32-vjeçar për veprën penale “Moskallzim i krimit”. Gjatë kontrollit të ambientit të lokalit policia gjeti dhe sekuestruan një sasi dozash me lëndë narkotike kokainë, e ndarë në doza.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.