Një sasi e dyshuar tritoli ka rezultuar në fakt në dy përgjues satelitorë GPS, nën dy makinat e shtetasit nga Pogradeci, Eris Çekani. Ky i fundit nuk është emër i panjohur për policinë, pasi pak kohë më parë ishte protagonist në një ndekje dhe përplasje me makina kundër një grupi tjetër rival, në aksin Pogradec-Elbasan.
LEXO EDHE:
Sherr nga Pogradeci deri në Elbasan, 5 të rinj ndjekin njëri-tjetrin dhe përplasen me makina
Dy makinat e 39-vjeçarit Çekani kanë qenë të parkuara pranë Prokurorisë në Progradec dhe roja e këtij institucioni ka parë autorët teksa kanë qenë duke vendosur një send poshtë automjeteve. Ai ka dyshuar fillimisht se bëhej fjalë për eksploziv, por pas mbërritjes forcave xheniere nga Tirana u konstatua që nuk ishte lëndë shpërthyese. Çekani këto 2 makina i lëshon me qira dhe mbetet mister motivi se përse atyre u është vendosur sinjalizues GPS (pa dijeninë e të zotit).
“Në lagjen nr. 3, Pogradec, nën dy automjetet në pronësi të shtetasit E.Ç., 39 vjeç, banues në Pogradec (të cilat i lëshon me qira) janë konstatuar dy sende të dyshimta”, thuhet në njoftimin e policisë.
Burime të policisë konfirmojnë se Çekani kohët e fundit ka pasur disa konflikte me persona të tjerë në Pogradec, ku më i fundit ishte ndjekja dhe përplasja me automjete në aksin Pogradec-Elbasan.
Nga ana e policisë, janë sekuestruar të gjitha kamerat në zonë, për të bërë të mundur identifikimin e personit që ka vendosur GPS, e për të zbardhur më tej rrethanat.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.