.png)
Autoritetet greke kanë shpallur në kërkim një 20-vjeçar shqiptar, i cili akuzohet si pjesë e grupit që dhunuan për vdekje adoleshentin grek në Selanik, Alkis Kambanu.
Ai dyshohet se është bashkëpunëtori i 23-vjeçarit tjetër shqiptar, që akuzohet për vrasje, i cili është arrestuar nga policia greke.
Së bashku me një grup grekësh dhe shqiptarësh, ata konsiderohen si pjesë e tifozerisë huligane të skuadrës së futbollit PAOK i Selanikut.
Sipas mediave helene, 20-vjeçari shqiptar me iniciale D.R., është arratisur drejt Shqipërisë që më datë 2 shkurt.
Televizioni “Mega” raporton se i riu u largua nga Greqia një ditë pas sulmit ndaj 19-vjeçarit Alkis, i cili mbeti i vdekur. Sipas të dhënave, 20-vjeçari kaloi kufirin greko-shqiptar me makinë rreth orës 23:45.
Ai ka kaluar normalisht nëpër pikën kufitare të Kapshticës, madje ka vulosur edhe pasaportën e tij shqiptare, pasi deri paraditen e së shtunës, nuk ka qenë në kërkim.
Ndërkohë, 23-vjeçari shqiptar që është i arrestuar për krimin, nuk e pranon vrasjen dhe nuk pranon të bashkëpunojë, sipas mediave lokale.
Megjithatë, policia greke e konsideron atë vrasës të dyshuar në bazë të disa pamjeve të sigurisë, të cilat janë publikuar edhe në media.
Tifozët e PAOK-ut sipas policisë greke vepronin si një organizatë kriminale, ndërsa prokuroria ka nisur hetimet në lidhje me këtë çështje.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
