Gazeta Si - Gjykata e Apelit ka lënë në fuqi vendimin “burgim i përjetshëm” për Aleksandër Përdodën, autorin e vrasjes së dyfishtë të rapsodit Kol Murrani dhe mikut të tij Preng Simoni 3 vite më parë.
Ngjarja ka ndodhur në 27 prill 2020 në Lalm i Ri, Lezhë, ku Aleksandër Përdorda vrau pranë pronës së tij rapsodin Kol Murrani dhe mikun e tij, pasi zbuluan parcelat me kanabis në tokat e tyre.
Ai kishte apeluar vendimin e Gjykatës së Lezhës, që e kishte dënuar me burgim të përjetshëm për akuzat “Vrasje në rrethana të tjera cilësuese”, e kryer në bashkëpunim, “Mbajtja pa leje dhe prodhimi i armëve, armëve shpërthyese dhe i municionit”, si dhe “Moskallëzim krimi”.
Aleksandër Përdoda kishte kërkuar të shpallej i pafajshëm, por Apeli ka lënë në fuqi dënimin e tij me burgim të përjetshëm.
Pasi Prokuroria mbylli hetimet, Gjykata e shpalli fajtor Përdodën në prill 2022 dhe e dënoi me burgim të përjetshëm për vrasjen e dyfishtë.
Përdoda, njihej në zonë si kultivues i lëndëve narkotike dhe kishte patur probleme pronësie edhe me banorë të tjerë të fshatit.
Në orët e para të mëngjesit të 27 prillit 2020, Preng Simoni dhe Kol Murrani u vranë me kallashnikov në banesat e tyre.
Trupat e tyre u lanë në pyllin e fshatit për 5 orë dhe u gjetën nga i biri i Preng Simonit. Hetimet e kryera, fajësuan vëllezërit Edmond dhe Aleksandër Përdoda, duke pretenduar se ekzekutuan dy miqtë Simoni dhe Murrani për konflikte pronësie, pasi kishin mbjellë kanabis në tokat e viktimave.
Fillimisht, u arrestua Aleksandër Përdoda për ngjarjen e rëndë, ndërsa pas gati dy vitesh arrati, pasditen e 11 shkurtit 2022, Edmond Përdoda u gjet në banesën e tij në fshatin Lalm i Ri, pasi u gjurmua me dron. Një njësi speciale e RENEA-s e arrestoi në shtëpinë e tij, ku 39-vjeçari nuk bëri rezistencë ndaj forcave speciale.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.