Gruaja e ekzekutuar mbrëmjen e të dielës në Shkodër nga vëllai i saj në banesë, sapo kishte ardhur nga Gjermania, ku jetonte si emigrante prej disa vitesh.
Diana Vukaj kishte ardhur në shtëpinë e vëllait të saj të vogël, por vizita për pushime në Shqipëri ka përfunduar në mënyrë tragjike.
Dyshohet se Fabian Vukaj, 55 vjeç, e kishte ekzekutuar që të premten me një pistoletë tip “Zastava”me silenciator me 4 plumba motrën e tij.
Ndërkohë që trupi i 58-vjeçares është mbajtur i pajetë prej dy ditësh në shtëpi në lagjen “Ndoc Mazi” në Shkodër. Gjithçka u zbulua mbrëmjen e së dielës rreth orës 22:30 kur dhe efektivët e policisë mbërritën në shtëpinë e 55-vjeçarit dhe gjetën gruan të vrarë në krevat.
Burime shprehen se viktima e ndihmonte shpesh të vëllain, pasi dyshohet se ai luante boxhoz dhe në momentin e krimit mendohet se ka qenë nën efektin e alkoolit.
Grupi hetimor, dyshon se refuzimi për t’i dhënë para vëllait, është një nga pistat e hetimit të krimit në familje.
Pas kthimit nga Gjermania, ajo është ndalur për të qëndruar në shtëpinë e saj në Shkodër dhe për pak ditë do të nisej për në shtëpinë e saj të pushimit në Velipojë.
Autori i kësaj ngjarjeje, Fabian Vukaj është vënë në prangat e policisë, ndërkohë që vijojnë hetimet për të zbardhur të plotë rrethanat e kësaj ngjarjeje të rëndë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.