Gazeta Si – Trofeu i Kupës Shqipërisë ka shkuar për Skënderbeun te femrat dhe te Partizani për meshkujt. Humbësja e dyfishtë është Tirana, që nuk mundi të fitonte asnjë nga finalet e edicionit 2023-2024 të këtij kompeticioni.
Në volejbollin e femrave, Skënderbeu i drejtuar nga trajneri Orlando Koja, mbetet superfuqi. Korçaret kanë mundur 3-1 Tiranën, duke e dominuar finalen. Vetëm pak ditë më parë Skënderbeu kishte fituar edhe trofeun e Ligës “Gjergj Kastrioti”. Korçaret e rrjetës janë gjithashtu pretendente kryesore për titullin kampion në kampionat.
Një fitore bindëse arriti në finalen e meshkujve Partizani, që mundi pastër Tiranën, 3-0. Sfida e zhvilluar në sallën “Feti Borova” ishte e gjitha nën diktatin e Partizanit. Tirana ishte e pafuqishme për të bërë rezistencë, siç tregon edhe vetë rezultati.
Për Partizanin është trofeu i 14-të i Kupës së Shqipërisë. Të kuqtë po udhëheqin edhe kampionatin me pikë të plota, çka tregon qartë forcën e tyre këtë sezon. Tirana, që ishte fituese në fuqi e Kupës, është dorëzuar para rivalëve të saj.
Lojtari i finales u shpall Osman Qepa i Partizanit, autor i 10 pikëve. Mjaft mirë u paraqitën edhe dy lojtarët brazilianë të ekipit të trajnerit Ylli Tomori, Koutinjo dhe Soares.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
