.png)
Gazeta Si - Pak orë pasi ka pranuar vrasjen e babait të saj 50-vjeçar, Hygerta Meta është rikthyer në vendin e krimit.
E shoqëruar nga policia dhe grupi i hetimit, 19-vjeçarja që banonte në Shënavlash të Durrësit, ka treguar dinamikën e vrasjes së Pëllumb Metës.
Me një maskë në fytyrë, siç shihet dhe në video, ajo mbahet për krahu nga një oficere policie, ndërsa hetuesit i bëjnë pyetje.
Pikërisht tek kjo kasolle që ndodhet në oborrin e shtëpisë, ajo varrosi të atin, pasi e ekzekutoi atë me armë zjarri.
19-vjeçarja, studente për Administrim Biznes në Tiranë, e ka pranuar krimin dhe ka deklaruar se e vrau të atin sepse ai donte ta martonte pa dëshirën e saj.
Ajo po ashtu ka deklaruar se krimin e ka kryer e vetme, se e ka vrarë të atin me pistoletë në katin e dytë të shtëpisë dhe më pas e mbështjellë me qese dhe e ka groposur në kasolle.
Dyshimet e hetuesve janë se ajo mund të mos ketë vepruar e vetme dhe të jetë ndihmuar nga familjarët.
Ndaj dhe për të zbardhur plotësisht këtë ngjarje, hetuesit e kanë çuar atë pikërisht në skenën e krimit, ku e reja ka treguar hap pas hapi gjithçka ka ndodhur.
Dyshime që shtohen dhe më shumë pas deklaratës së krushkut të familjes Meta, i cili pohoi për mediat se “Hygerta nuk vriste dot një pulë”.
Autoritetet po kërkojnë edhe armën e krimit, që nuk kanë mundur ta gjejnë ende. Trupi i 50-vjeçarit Pëllumb Meta u zbulua mëngjesin e kësaj të premteje, 10 ditë pasi ishte denoncuar i zhdukur nga djali i tij 25-vjeçar.
Krimi është kryer me një armë pistoletë, të cilën viktima e mbante pa leje në banesë dhe që sipas dëshmisë së 19-vjeçares pas kryerjes se krimit e ka hedhur në sektorin “Rinia” të plazhit. Atje vajza kishte lënë edhe mjetin e të atit për të humbur gjurmët.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
