.png)
Gazeta Si - Një shqiptar dyshohet se është autori i vrasjes së një bashkëkombësi të tij 50 vjeç një ditë më parë në Selanik të Greqisë.
Mediat greke shkruajnë se autori i vrasjes jashtë një karburanti, mësohet të jetë i njohur për policinë, me precedentë të më parshëm penalë.
Ndërkohë, mediat greke kanë publikuar edhe një foto të autorit. Sakaq, hetimet për zbardhjen e krimit po vijojnë, ndërsa policia ka nisur kontrollet për kapjen e autorit, pasi materialet vizuale nga kamera e sigurisë së karburantit kanë ndihmuar në identifikimin e autorit.
Në të njëjtën kohë, policia ka dhënë urdhër për mbylljen e kufijve, pasi si sulmuesi ashtu edhe bashkëshortja e tij, që ndodheshin në makinën që ai drejtonte, vijnë nga Shqipëria dhe ekziston frika se do të ikin në shtetin fqinj.
Një video tronditëse, nga vrasja e 50-vjeçarit në një pikë karburanti në Selanik u publikua nga mediat. Viktima shihet duke iu afruar një makine me ngjyrë të errët, makinë që është e palëvizshme dhe po debaton me shoferin.
Teksa tenton të godasë me një send drejtuesin e mjetit, duke futur duart nga dritarja e hapur e mjetit, ai qëllohet dhe bie i vdekur në rrugë. Më pas shoferi largohet me shpejtësi dhe zhduket. Bëhet e ditur se në vendin e vrasjes janë gjetur dy gëzhoja.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
