.png)
Një rast i veçantë në basketbollin amerikan. Hjuston është përpara 102-89 dhe përpiqet ta administrojë lojën ndaj San Antonios, që në mesin e periodës së tretë është 22 pikë prapa. Harden ngadalëson hapat dhe pastaj zhyt topin në kosh. Topi hyn dhe pastaj, për një lëvizje të pazakontë të rrjetës, del. Ylli i Rokets hutohet dhe për një moment kujton se ka humbur dypikëshin më të lehtë të karrierës, pastaj sheh në ekran dhe kupton që topi ka hyrë në kosh dhe rezultati shkon 104-89. Vetëm se për arbitrat topi nuk ka hyrë kurrë në kosh dhe në fund ndeshja është fituar nga San Antonio Spërs 135-133, pas dy shtesave.
Kjo ndeshje është bërë çështje në NBA, pasi ky nuk është një gabim normal arbitrar. Topi ka hyrë në koshin që ishte në rregull dhe kështu që kemi të bëjmë me një gabim teknik. Është një interpretim i gabuar i rregullores. E ka pranuar pas ndeshjes edhe Xhejms Kepërs, arbitri kryesor, i cili i ka riparë pamjet disa herë në dhomat e zhveshjes. Në parketin e “At&t Center” nuk mundi ta bënte, edhe pse e ka të drejtën ta rishohë aksionin. Sipas rregullores së re, që i lejon trajnerët t’u kërkojnë arbitrave të shohin përsëritjen e një aksioni, funksionon kështu: kërkohet një pushim dhe trajneri ka 30 sekonda për të paraqitur ankesën e tij. Por trajneri i Hjuston Rokets e humbi kohën duke protestuar për koshin e munguar. “E kërkuan shumë vonë, në fund të pushimit dhe në atë momoment ishte e pamundur të rishihej përsëritja e aksionit”, - ka shpjeguar Kepërs.
Por gabimi mbetet dhe para së gjithash i ka kushtuar Hjustonit humbjen e ndeshjes. NBA–ja mund të vendosë për të riluajtur 7 minutat e 50 sekondat e fundit të ndeshjes. Një tjetër mundësi është që koshi të quhet dhe t’i jepen 2 pikët Hjustonit, që do të fitonte 117-115 pas 48 minutash lojë. Por varianti më i thjeshtë dhe më i lehtë është që të riluhet ndeshja. Ka ndodhur edhe më parë që në NBA të përsëriten ndeshjet. Janë tri ndeshje të përsëritura për gabime teknike. Herën e fundit ka ndodhur në sezonin 2007-08, kur Hits dhe Hauks riluajtën 51 sekondat e fundit, sepse Shakill O’Nill, atëherë te Majemi, u ndëshkua për një faull që nuk e kishte kryer dhe la përketin, pasi plotësoi numrin 6 të gabimeve.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
