.png)
Gazeta Si – Një banesë e përshtatur për kultivim të bimëve narkotike me llamba është zbuluar këtë të martë në Tiranë.
Policia thotë se në pranga kanë rënë dy persona, si dhe janë sekuestruar një shumë e madhe parash, pajisje për kultivimin e kanabisit, bimë dhe lëndë narkotike, radio si të policisë dhe sende të tjera. Mes të arrestuarve është edhe Leonardo Zela, nipi i Emiljano Shullazit (djali i motrës së tij).
Gjatë operacionit u arrestua në flagrancë shtetasi A.K., 38 vjeç, për veprat penale “Kultivimi i bimëve narkotike” dhe “Prodhimi dhe shitja e narkotikëve”.
Gjatë kontrollit në banesën e tij, janë gjetur dhe sekuestruar vazo me fidanë kanabis të kultivuara, 31 llamba elektrike, një sasi rreth 140 gramë lëndë narkotike e dyshuar kanabis sativa, e cila ishte e ambalazhuar në 7 kavanozë qelqi të përmasave të ndryshme, një radio si ato që përdoren nga policia, një bllokues valësh dhe një detektor për kërkimin e GPS.
Operacioni ka vijuar edhe në zonën e ish-Parkut në Tiranë, ku ka rënë në pranga nipi iEmiljano Shullazit, Leonardo Zela, i akuzuar për veprën penale “prodhimi dhe shitja e narkotikëve”.
Zela u vu në pranga pasi tregonte kanabis në sasi të vogla dhe më pas ndante paratë me 38-vjeçarin A.K., i cili kujdesej për kultivimin e kanabisit në vazo lulesh dhe më pas e ruante atë në kavanozë prej qelqi.
Në shtëpinë e Zelës policia gjeti dhe sekuestroi një sasi kanabis gati për shitje, 4 kavanozë me lëndë narkotike, një peshore elektronike dhe shumat e parave të ndara në 11150 euro dhe 11.000 paund.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
