.png)
Një epsido i rrallë në tenis. Gjatë ndeshjes së fazës së 1/8-ve të “Us Open” ndaj Carreno Busta, numri 1 i botës, Novak Gjokoviç, goditi me top në kokë një gjyqtare linje, e cila u rrëzua në tokë dhe pati vështirësi në frymëmarrje. Përjashtim i menjëhershëm i tenistit serb, sipas rregullores.
Novak Gjokoviç është jashtë turneut ku ishte favoriti kryesor. Skualifikim i menjëhershëm për një veprim, hijet e të cilit do ta shoqërojnë gjithë jetën, edhe pse e bëri në mënyrë të pavullnetshme. Ai ishte duke gjuajtur një top drejt tabelave, por qëlloi gjyqtaren në gejmin e 11-të të setit të parë. Gjokoviç ishte pak nervoz, pasi humbi tre mundësi për të fituar setin. Në momentin e ndërrimit të fushës, ai gjuajti topin me raketë, pa parë se ku po e çonte.
Gjyqtarja e linjës u rrëzua në tokë dhe pati vështirësi në frymëmarrje. Pas disa sekondash dhe ndjesës së serbit ndaj gjyqtares, hynë në fushë drejtori i turneut dhe supervizori, zvicerani Egli, për t’i komunikuar tenistit të vetmin vendim të rregullores për raste të tilla: përjashtimin nga turneu.
Novak Gjokoviç tentoi të mbrohej, më shumë për inerci, por më pas i shtrëngoi dorën kundërshtarit dhe u largua nga fusha me kokën ulur. Deri tani, për vitin 2020 ai kishte 26 fitore në 26 ndeshje. Dhe zgjodhi mënyrën më të keqe për humbjen e parë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
