Gazeta Si - Prokuroria e Tiranës ka pranuar ndihmën e një grupi specialistësh mjeko-ligjorë nga Italia për kryerjen e ekspertizës shkencore për të përcaktuar shkakun e vdekjes së 3-vjeçarit, Brian Spahiu.
I mituri gjeti vdekjen në reanimacionin e pediatrisë në QSUT më 1 tetor, 3 ditë pas ndërhyrjes në një klinikë dentare private në Tiranë të mjekut Roland Xhaxho.
Ekspertiza për shkakun e vdekjes së 3-vjeçarit, shkaktoi edhe përplasje mes Prokurorisë së Tiranës dhe Institutit të Mjekësisë Ligjore.
LEXO EDHE:
- Prokuroria kërkoi ekspertë të huaj për vdekjen e 3-vjeçarit në klinikën private, Mjekësia Ligjore: Fyerje e rëndë!
- Tiranë, 3-vjeçari humb jetën pas operacionit te dentisti. Familja akuzon mjekun, kërkon drejtësi: Ndryshe e bëjmë vetë!
- Vdekja e 3-vjeçarit në Tiranë/ Nis hetimi për neglizhencë. Alibia e mjekut dhe mungesa e kamerave në klinikë
Sipas Prokurorisë së Tiranës, akti i parë i ekspertizës që përcaktoi shkakun e vdekjes së 3-vjeçarit, mbidozë e narkozës dhe që shkaktoi mos funksionim të organeve, ishte i paplotë dhe konkluzioni ishte i pasaktë, ndaj për këtë arsye u kërkua ri-ekspertizë.
Një tjetër arsye që u kërkua riekspertizë, ishte dhe fakti që sipas prokurorisë mjekët specialistë janë në konflikt interesi me personat nën hetim, përfshirë mjekun Roland Xhaxho.
Në janar të këtij viti, Instituti i Mjekësisë Ligjore, në një reagim e cilësoi kërkesën e prokurorisë për ekspertizën e mjekëve të huaj si "një fyerje të rëndë për shkencën dhe mjekësinë".
Nga ana tjetër, sipas mjekësisë ligjore, janë kryer si duhet procedurat për caktimin e shkakut të vdekjes. Sipas IML-së, krahas dy mjekëve që kryen autopsinë, morën pjesë edhe dy mjekë të tjerë të IML-së, të cilët janë specialistë të anatomisë patologjike.
Babë e bijë, Roland dhe Ina Xhaxho janë në hetim në gjendje të lirë nga Prokuroria e Tiranës për veprën penale “Neglizhenca ne trajtim mjekësor”.
Dyshimet e para flasin se vdekja e fëmijës ka ardhur si rezultat i narkozës, por ende nuk është provuar shkencërisht.
Për t’i dhënë përgjigje kësaj enigme, Prokuroria e Tiranës i është drejtuar me një letërporosi autoriteteve italiane, duke caktuar tre mjekë ligjorë për kryerjen e ekspertizës shkencore, me qëllim nxjerrjen e shkaqeve të vdekjes së vogëlushit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.