.png)
Finalja e parë e një turneu “Slam” për gjermanin Aleksander Zverev, i cili ka dhuruar spektakël, duke mundur me përmbysje në 5 sete Karreno Busta në gjysmëfinale. Për titullin e turneut amerikan ai do të sfidojë në finale austriakun Thiem që mundi në 3 sete Medvedevin.
Kampioni i 150-të i “US Open” do të jetë njëri mes Aleksander Zverev dhe Dominik Thiem. Zverev ka bërë një ndeshje të madhe në gjysmëfinale, ku po humbiste 0-2 ndaj Pablo Karreno Busta, por përmbysi gjithçka në 3-2. Rezultatet e seteve janë 3-6, 2-6, 6-3, 6-4 dhe 6-3. Gjermani shfaqi të gjithë potencialin e tij. Sapo largoi frikën e humbjes, ai dominoi tre setet e fundit dhe për Karreno Busta nuk kishte shanse, edhe pse spanjolli ishte në avantazhin e dy seteve.
Zgjimi i Zverevit erdhi në gejmin e katërt të setit të tretë, kur ai filloi të shërbente më mirë dhe të gabonte më pak, duke u ndjerë i relaksuar. Karreno Busta e uli pak ritmin, duke bërë gabime të pafalshme dhe më pas nuk arriti të merrte më veten. Spanjolli anuloi “match point”-in e parë të ndeshjes, por kapitulloi në të dytin. Ndeshja zgjati 3 orë e 22 minuta.
Në gjysmëfinalen tjetër mjaftuan tre sete që Dominik Thiem të mbyllte llogaritë me Andrei Medvedev, në një formë të dobët. Superioriteti fizik i Thiem bëri diferencën në këtë ndeshje. Seti i parë u fitua nga austriaku 6-2 pas 35 minutash lojë. Në të dytin ai vuajti jo pak, por e mbylli 7-6, ashtu si dhe të tretin. Për Dominik Thiem, finalja e së dielës do të jetë e para në “US Open”, edhe e katërt në turnetë “Slam”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
