.png)
Në javët e fundit, numri i ushtarëve rusë në kufirin me Ukrainën, ka mbetur i qëndrueshëm (rreth 100,000), pavarësisht parashikimeve të inteligjencës amerikane për një rritje.
Megjithatë, zyrtarët amerikanë, të kontaktuar nga gazeta "New York Times" dhe të mbrojtur nga anonimiteti, thonë se udhëheqësi i Kremlinit, Vladimir Putin ka filluar të marrë disa hapa për transferimin e helikopterëve ushtarakë në vend.
Një shenjë e mundshme, që planet për një sulm vazhdojnë pavarësisht bisedimeve në Evropë me SHBA-të, NATO-n dhe OSBE-në.
Rusët thuhet se kanë vendosur helikopterë sulmues dhe transportues, të cilët, së bashku me forcat sulmuese nga toka, do të ishin një avantazh vendimtar për Moskën, nëse Putin vendos të pushtojë Ukrainën.
Sipas të njëjtave burime, qëllimi i pushtimit të presidentit rus është i kufizuar, i diktuar nga temperaturat që do të ngrijnë tokën - duke lejuar lëvizjen e shpejtë të automjeteve të rënda dhe pajisjeve - përpara se shkrirja e pranverës, e cila mund të fillojë në mars, të krijojë një moçal me baltë. Për momentin, Shtetet e Bashkuara dhe Rusia “kanë rënë dakord që të mos pajtohen” për mosmarrëveshjen e tyre.
Tetë orë bisedime, plus një darkë private në brigjet e liqenit të Gjenevës mbrëmjen e kaluar në Zvicër, konfirmojnë se Uashingtoni dhe Moska mbeten larg çdo perspektive për të kënaqur shqetësimet e sigurisë së njëri-tjetrit.
Por në “qytetin e paqes”, kanë shkëmbyer disa pikëpamje të qeta dërguarit e Shtëpisë së Bardhë dhe Kremlinit dhe mbi të gjitha kanë vendosur që loja të vazhdojë.
Një nga më të rëndësishmet, është se Sergey Riabkov, zëvendësministër i Jashtëm dhe kreu i delegacionit rus, tha se Kremlini nuk ka plane për të pushtuar Ukrainën: "Nuk ka asnjë arsye për një skenar përshkallëzimi".
Bisedimet e Gjenevës janë faza e parë e një dialogu njëjavor, i cili do të vazhdojë nesër në Bruksel me Këshillin e ringjallur NATO-Rusi dhe të premten në Vjenë në kuadër të OSBE-së, Organizatës për Siguri dhe Bashkëpunim në Evropë.
Nuk është e qartë se çfarë do të jetë vazhdimi, nëse, siç është e mundshme, nuk do të arrihet një marrëveshje në një afat të shkurtër, por ndoshta i duhet dhënë kohë diplomacisë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
