.png)
Gazeta Si - Sipas presidentit amerikan Joe Biden, “rreziku i një sulmi rus në ditët e ardhshme është shumë i lartë; ne kemi arsye të besojmë se Rusia po kërkon një pretekst për të sulmuar”.
Presidenti amerikan shtoi se nuk ka plane për bisedime të mëtejshme me Putin për momentin, por u përgjigj pozitivisht për mundësinë e një zgjidhjeje diplomatike.
“Qëllimi i SHBA-së nuk është të fillojë një luftë, por ta shmangë atë”. Kështu deklaroi Sekretari amerikan i Shtetit, Antony Blinken, duke folur në Këshillin e Sigurimit të OKB-së për krizën në Ukrainë, duke nënvizuar se “diplomacia është e vetmja mënyrë e arsyeshme për ta zgjidhur atë”.
SHBA zbulon detajet e planit të sulmit rus
Para këshillit të sigurimit të OKB-së, Blinken shpjegoi detajet e sulmit të frikshëm rus në Ukrainë. Me më shumë objektiva: kryeqyteti Kiev, me "tanket dhe ushtarët që do të avancojnë kundër objektivave që tashmë janë identifikuar".
Sekretari i Shtetit, foli gjithashtu për "raketat dhe bombat e hedhura në të gjithë Ukrainën, ndërprerjen e komunikimeve dhe institucionet e paralizuara nga sulmet kibernetike". “Sulmet konvencionale nuk janë të vetmet që Rusia po përgatit të bëjë në Ukrainë, - shtoi ai, - ne kemi informacione që tregojnë se Rusia do të synojë grupe të veçanta”.
Mbrojtja amerikane raporton se Shtetet e Bashkuara "do të mbrojnë, nëse duhet, çdo centimetër të territorit të NATO-s" nga agresioni rus.
Aleanca, nga ana e saj, thekson se Moska "ka kapacitetin për të kryer një pushtim të plotë".
Sipas pro-rusëve, Ukraina bombardoi lindjen e vendit. Rebelët qëlluan me mortaja në një fshat në rajonin e Luhanskut, duke goditur një kopsht, është akuza e ushtrisë ukrainase.
Rusia: Të detyruar të reagojmë në mungesë sigurie
Nga ana e saj, Moska ka thënë se SHBA nuk ka dhënë një përgjigje konstruktive për propozimet e saj për garanci sigurie dhe mund të marrë masa ushtarako-teknike si përgjigje.
Kështu thuhet në përgjigjen me shkrim ruse drejtuar SHBA-së, sipas raporteve nga agjencia e lajmeve Interfax.
“Pala amerikane nuk ka dhënë një përgjigje konstruktive ndaj elementeve bazë të projekt-traktatit me Shtetet e Bashkuara të përgatitur nga pala ruse për garancitë e sigurisë”, - thuhet në dokumentin e Moskës.
“Në mungesë të gatishmërisë së palës amerikane për të rënë dakord mbi garancitë e forta, ligjërisht të detyrueshme për të garantuar sigurinë tonë nga Shtetet e Bashkuara dhe aleatët e saj, Rusia do të detyrohet të përgjigjet, duke përfshirë zbatimin e masave të natyrës ushtarako-teknike” - thuhet në dokument.
Moska dëbon zv/ambasadorin amerikan
Dëbimi i zëvendësambasadorit amerikan nga Moska, u shpjegua nga Rusia si një hakmarrje për një masë të ngjashme të miratuar nga Uashingtoni.
“Diplomati amerikan në fakt ishte urdhëruar të largohej nga Rusia, por rreptësisht si përgjigje ndaj dëbimit të paarsyeshëm të të dërguarit-këshilltarit nga ambasada jonë në Uashington, pavarësisht statusit të tij si zyrtar i lartë”, tha përfaqësuesja zyrtare e Ministrisë së Jashtme ruse, Maria Zakharova.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
