.png)
Gazeta Si - Me objektivin për të vrarë politikanët e Lezhës, Antonio Leka, i armatosur dhe i veshur me kamuflazh e antiplumb është, neutralizuar nga policia pak para një ngjarje kriminale që mund të kishte shkaktuar viktima.
Gjatë momentit të arrestimit, 36-vjeçari nuk ka shfaqur rezistencë ndaj punonjësve të policisë, por u ka thënë këtyre të fundit se ishte nisur në drejtim të Lezhës, për të vrarë politikanët. “…do vras politikanët e Lezhës, dhe të zhduk farën e keqe të tyre…”, - ka pohuar Leka.
Policia ka publikuar pamjet nga kamerat e sigurisë së një lavazhi, ku i riu shfaqet me plis në kokë dhe me armën kallashnikov mbi automjetin e tij.
Ka qenë vëllai i 36-vjeçarit ai që ka lajmëruar policinë se Antonio Leka po qarkullonte i armatosur me automjetin tip “Audi” dhe se kishte paralajmëruar se do të kryente një krim të rëndë.
Menjëherë forcat e policisë janë vënë në ndjekje të tij dhe pasi e kanë neutralizuar në automjetin e tij, kanë gjetur një automatik me 5 karikator, një pistoletë me 5 karikatorë të tjerë, 550 fishekë, një palë dylbi, një antiplumb, një thikë dhe një sasi lënde narkotike e llojit kanabis sativa.
Mësohet se para grupit hetimor, ai ka thënë se ishte nisur të kryente një krim ndërsa dyshohet se ka qenë nën efektin e lëndëve narkotike.
Për shkak të sekretit hetimor, policia thotë se nuk mund të jepen detaje të tjera në lidhje me motivet dhe objektivin e synuar nga i arrestuari, por mësohet se është me precedentë të mëparshëm penal, i akuzuar dhe arrestuar për plagosje dhe narkotike.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
