.png)
Stefanos Tsitsipas është kampioni i ri i “Finals Atp”. Tenisti i ri grek fiton titullin e katërt dhe sigurisht një nga më të rëndësishmit në karrierën e tij, që premton të jetë spektakolare. Tsitsipas iu imponua kundërshtarit, Dominik Thiem, në finalen që zgjati 2 orë e 35 minuta, ndërsa setet përfunduan 6-7, 6-2 dhe 7-6. Në moshën 21 vjeç e 3 muaj, greku është tenisti më i ri që nga 2001-shi që e fiton këtë turne, si dhe i riu i 6-të në historinw e tij, ku rekordi mbahet nga MekEnroe në vitin 1978, kur ai fitonte në moshën 19 vjeç e 11 muaj.
Një sezon i dominuar nga Rafael Nadal dhe Novak Gjokoviç, me spanjollin që fitoi në Paris dhe Flushing Meadows dhe me serbin që triumfoi në Australi dhe Uimbëlldon, është mbyllur nën shenjën e Stefanos Tsitsipas. Tenisti grek arriti të fitojë “Atp Finals” ndaj një lojtari në formë shumë të mirë si Dominik Thiem.
Tsitsipas është fituesi i 5-të i “Masters” në 5 vitet e fundit, por ndryshe nga “outsider”-at e tjerë, kjo fitore pritet ta lançojë grekun drejt një karriere të madhe. Fati i tij duket se është parashkruar, pasi tenisti i ri ka fituar disa turne që tani. E ardhmja e tenisit është në duart e Stefanos Tsitsipas. Në moshën 38 vjeç e 3 muaj, Roxher Federer është më afër pensionit dhe pas tij me radhë Nadal dhe Gjokoviç. Me shumë mundësi, tre “tenorët” që kanë dominuar skenën e tenisit për më shumë se 15 vjet, po ia lënë vendin gjeneratës së re, me në krye Tsitsipas (21 vjeç), Medvedev (23 vjeç), Thiem (26 vjeç), Berretini (23 vjeç) dhe Shapovalov (20 vjeç.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
