Çdo herë e më shumë po rriten shifrat e pacientëve diabetik, sidomos të tipit dy. Kjo sëmundje është shumë e lidhur me stilin e jetesës rastet e të cilës janë dyfishuar në mbarë botën, pas viteve 90.
Një ndër problemet më të shumta që ka kjo sëmundje është edhe këmba diabetike. Dëmtimi ulçeroz i këmbës diabetike është një ulçeracion që mund të formohet në pjesën e këmbës dhe kavilies tek personat me diabeti të tipit 1 dhe 2. Më shumë se 25% e personave diabetik kanë probleme me këmbët dhe më shumë se 80% e amputimeve janë kryer tek personat ku lezioni ulçeroz ëshë faktori kryesor. Diabeti mund të dëmtojë nervat e arterieve në këmbë. Prandaj në kushte të tilla mund të ul ndjeshmërinë duke çuar në formimin e lezioneve fillestare në këmbë.
Ndodh që lezionet ulçeroze të përkeqësohen dhe të infektohen, në të njëjtën kohë pacienti mos ta vë re. Nëse ndodh kjo, atëherë mund të shoqërohet dhe me prerjen e një gishti, e një pjese të këmbës apo gjymtyrve të poshtme.
Por, një zbulim teknologjik i kohëve të fundit, ka krijuar një fije shprese për të gjithë këta të sëmurë. Shkencëtarë kanë arritur të zhvillojnë një trajtim i cili kryhet më anë të një mase gjaku të pacientëve. Sipas tyre kjo është një tjetër arritje e madhe e mjekësisë.
Trajtimi, i quajtur LeucoPatch, është provuar në më shumë se 200 spitale në Evropë. Ky trajtim kryehet me anë të një sasie gjaku të pacientit. Gjaku vendoset në një enë e më pas në një makineri që rrotullohet qindra herë në minutë. Gjatë këtij procesi (të njohur si centrifugimi), qelizat e kuqe të gjakut të cilat janë më të dendurat shkojnë në fund, ndërsa qelizat e bardha të gjakut ngrihen sipër. Procesi gjithashtu veçon fibrinën, një proteinë edhe më pak të dendur që formon një substancë, e cila vepron si një mbulesë për plagën në këmbën diabetike. Pas kësaj gjaku ngjizet për të formuar një “barrierë” mbrojtëse për qelizat e shëndetshme të reja të lëkurës, të cilat mund të zhvillohen gjithë kohës më pas.
E projektuar për të trajtuar dëmtimin ulçeroz i këmbës diabetike, pjesa e marrë nga centrifugimi i gjakut vendoset mbi plagë dhe mbulohet me fasho. Ky proces duhet të përsëritet javë pas jave derisa sa plaga të shërohet. Shkencëtarët shpjegojnë se mund të duhen rreth 20 javë për të shëruar plotësisht këtë gjendje tek personat diabetik, një komplikacion tejet i zakonshëm, por edhe i rrezikshëm, pasi mund të shkaktojë edhe prerjen e gjymtyrëve të poshtme.
Shumica e këtyre rasteve momentalisht trajtohen me një kombinim debridement (heqjen e indeve të vdekur) me antibiotikët (për të luftuar infeksionin) dhe fashot mbrojtëse. Por, në një numër të konsiderueshëm rastesh, plaga nuk arrin të shërohet për shkak të mungesës së qarkullimit të gjakut përmes enëve të gjakut të cilat janë dëmtuar.
Rezultatet e studimit mbi trajtimin LeucoPatch u paraqitën kohët e fundit në revistën The Lancet Diabetes &Endrocrinology. Studimi përfshiu më shumë se 260 pacientë të cilët vuanin nga kjo gjendje, e cila është vështirë për t’u kuruar. Gjysma u trajtuan me LeucoPatch dhe gjysma tjetër kreu një trajtim të zakonshëm si, debridement për shembull. Vëzhgimet zgjatën për gjashtë muaj. Rezultatet treguan se në grupin e trajtuar me LeucoPatch, 34 përqind e të sëmurëve u shëruan plotësisht për një periudhë të shkurtët 3 mujore, krahasuar me 22 përqind të grupit tjetër.
Në vende të ndryshme shumë pacientë kanë përfituar këtë trajtimi. Një prej tyre ishte dhe 54 vjeçari Philip Herberts nga Yorkshire, i cili me anë të këtij trajtimi kishte shmangur amputimin e këmbës së tij.
“Isha me pushime, kur vura re një flluskë të madhe tek këmba ime e djathë. Gjatë 12 muajve të ardhshëm, ajo bëhej gjithnjë e më e madhe, pavarësisht përpjekjeve të vazhdueshme të mjekëve të mi për a kuruar,” shtoi Herberts.
Më pas ai tregon, për Daily Mail se mjekët e kishin informuar se do të duhej të priste këmbën nëse ulcera nuk shërohej. Ai shprehet se ishte i tmerruar, por ekipi i mjekëve në Spitalin Wakefield, në Yokshire, i sugjeroi atij të kryente trajtimin LeucoPatch dhe vetëm pas tetë seancash trajtimi, Herberts ishte shëruar plotësisht.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.