.png)
Në tetor të 2018-ës ndodhi një tragjedi jashtë stadiumit “King Power Stadium” të Leisterit, ku humbën jetën pronari i klubit anglez Srivaddhanaprabha dhe 4 persona të tjerë. Helikopteri i tyre u rrëzua dhe shpërtheu në flakë vetëm pak momente pasi ishte ngritur nga stadiumi. Nga hetimet u mësua se bëhej fjalë për një problem teknik, ndërsa tani ka zhvillime të tjera sa i takon kësaj ngjarjeje.
Familja e Nusara Suknamai, njërës prej viktimave, ka ngritur një padi ndaj pronarëve të klubit dhe kërkon një dëmshpërblim prej 9 milionë eurosh. Një vit pas ngjarjes që shokoi futbollin botëror dhe veçanërisht atë anglez, çështja ka marrë rrjedhë tjetër. Përveç pronarit të Leisterit, kampion i Anglisë në vitin 2016, Vichai Srivaddhanaprabha, ndërroi jetë edhe bukuroshja tajlandeze Nusara Suknamai, 32 vjeç (vendi i dytë në 2005-ën në “Miss Thailand Universe”), asistente personale e bosit të klubit anglez.
Tani familja e saj e ka ndjekur çështjen ligjërisht dhe ka çuar në gjyq pronarët e Leisterit, duke u kërkuar një dëmshpërblim prej 7.9 milionë stërlinash, rreth 9 milionë euro. Avokatët bëjnë me dije se familja e Nusaras ka marrë deri tani vetëm 2 mijë sterlina për ceremoninë mortore. Po ashtu, ata kanë pohuar se janë refuzuar oferta prej 20.100 dhe 40.200 stërlinash, që konsiderohen të pamjaftueshme sa i takon dëmshpërblimit. Procesi gjyqësor do të mbahet në Bangkok, në nëntor.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
