.png)
Gazeta Si – Një këmbësor 32-vjeçar humbi jetën në Tiranë mesditën e të martës në një aksident rrugor, pasi u përplas nga një kamion.
Viktima është Oligert Dika, i cili njihet si Olsi dhe të gjithë përdoruesit e rrjetit social “Tik Tok” e njohin si “polic”, pasi gjithmonë qëndron në këtë zonë, duke treguar afrimitet me drejtuesit e mjeteve. Mësohet se i aksidentuari është dërguar në spital, ku ka ndërruar edhe jetë.
Policia thekson se mjeti i rëndë ka përplasur këmbësorin në rrugën “Kastriotët” në kryeqytet në rrethana ende të paqarta në zonën e njohur si rrethrrotullimi i Treshit në Kamëz.
Në platformën sociale janë të shumta videot ku 32-vjeçari shfaqej në rrugë duke ‘drejtuar’ trafikun, si të ishte polic i Rrugores. Në disa prej videove të postuara nga përdorues të ndryshëm në TikTok, 32-vjeçari shihet në rrugë, teksa mban tabelë e bilbil.
Ai ishte shndërruar në personazh në Tik Tok pikërisht për “profesionin” që siç duket e kishte me pasion. Edhe këtë të martë, Olsi ndodhej në rrugë, i veshur me jelek si ato të Policisë Rrugore e me tabelë në dorë, kur u përplas teksa ndodhej në vijat e bardha.
I riu është viktima e pestë në tre ditë, pas aksidenteve tragjike të shënuara në fundjavë në Librazhd, Tiranë te Astiri dhe Durrës, ku humbën jetën 4 persona.
Po sot në Korçë, drejtuesi i një motori mbeti i plagosur, pasi u përplas nga një automjet në afërsi të fshatit Bulgarec.
Menjëherë pas përplasjes, shoferi i makinës e ka transportuar vetë të plagosurin drejt spitalit të Korçës.
Ndërkohë, autoritetet policore ndodhen në vendngjarje dhe kanë nisur punën për të zbardhur rrethanat e plota të këtij aksidenti.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje