.png)
Gazeta Si – Për rreth 2 orë, për të dytën ditë me radhë, qindra qytetarë, aktivistë dhe ambientalistë kanë protestuar pasditen e kësaj të hëne në Tiranë kundër ndërtimit të resortit 4 miliardë eurosh që është planifikuar të ndërtohet në Zvërnec të Vlorës.
Protestuesit janë grumbulluar fillimisht para Ministrisë së Brendshme, nga marshuan drejt godinës së kryeministrisë. Në duar mbajnë pankarta me mesazhe si “Shqipëria nuk është në shitje” dhe slogane të forta politike, duke kërkuar madje edhe anulimin e projektit turistik në një nga zonat të bukura në vend.
Gjatë protestës, disa nga qytetarët kanë rrethuar me tel me gjemba godinën e Ministrisë së Brendshme, si shenjë e protestës së tyre për mbrojtjen e Zvërnecit.
Ata kanë përcjellë mesazhin “Nesër më shumë”, duke lënë të kuptohet se pjesëmarrja pritet të rritet të martën pasdite në protestën e radhës.
Pas protestës, kryeministri Edi Rama pati një tjetër reagim sa i takon çështjes së Zvërnecit. Duke theksuar se qytetarët po manipulohen, ai njofton se projekti po hartohet nga pesë studio arkitekturore, ndër më të mirat në botë.
Duke komentuar kërkesën e protestuesve për anulimin e projektit të planifikuar në zonë, Rama thekson se deri tani nuk ekziston asnjë projekt konkret investimi që mund të anulohet.
“Të anuloj projektin? Për këtë i thirrët në protestë njerëzit e mirë që ju erdhën pas edhe sot? Dakord jam, ma sillni projektin dhe e anulojmë! Po si i bëhet që ju s’keni çfarë sillni, sepse nuk ka projekt?”.
Ky është tubimi i dytë radhazi pas thirrjeve të shpërndara përmes rrjeteve sociale. Një ditë më parë, qindra qytetarë marshuan nga Drejtoria e Policisë së Tiranës drejt Ministrisë së Brendshme dhe përfunduan para Kryeministrisë, duke treguar angazhimin e fortë të qytetarëve për çështjet mjedisore dhe ruajtjen e hapësirave të mbrojtura.
Kjo protestë vjen pas zhvillimeve që ndodhën të shtunën e 29 majit në Zvërnec, ku gjatë një proteste të thirrur nga qytetarë e ambientalistë, një protestues u dhunua barbarisht nga disa roje të një kompanie sigurie private.
Pamjet filmike të shpërndara në rrjetet sociale treguan persona civilë pa uniformë që tërhiqnin zvarrë një protestues, ndërsa policia e Vlorës pranishme nuk ndërhyri.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje