.png)
Zyra Qendrore e Menaxhimit të Emergjencave thotë se janë rreth 2600 banorë të strehuar nëpër hotele dhe dhe se vijojnë të marrin ndihmë mjekësore 29 persona nga të cilët 22 në Spitalin e Traumës, 4 në Spitalin e Durrësit dhe 3 të tjerë të transferuar jashtë vendit për kurim.
Shifra është sa gjysma e personave që të dhënat paraprake kanë sugjeruar se kanë nevojë për strehim urgjent, që përllogaritet në rreth 5200 persona.
Gjithashtu kjo zyrë thotë se vazhdon puna për identifikimin e godinave të dala jashtë përdorimit dhe shembja e tyre në bashkinë Durrës, mbi bazën e vendimeve të këshillit bashkiak. Deri më sot, në qarkun Durrës janë prishur 12 banesa të shkatërruara dhe 5 të tilla në Thumanë.
Dëme të mëdha në shumë banesa janë identifikuar edhe në Krujë, Shijak, Kurbin, Tiranë, Kamëz, Vorë, Lezhë.
Ndërkohë, Qeveria miratoi paketat e ndihmës për familjet e 51 viktimave të tërmetit të 26 nëntorit, që përfshijnë strehimin e menjëhershëm të familjarëve, pensione speciale, si dhe mbulimin e shpenzimeve për ceremonitë mortore. Qeveria thotë se janë kontaktuar familjet e 51 viktimave të tërmetit të 26 nëntorit për të diskutuar me ta hapat konkretë për strehimin e tyre të menjëhershëm dhe fillimin e procedurave për marrjen e pensioneve speciale.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
