.png)
Gazeta Si- Një 38-vjeçar shqiptar ka mbetur i plagosur nga policia greke në zonën Colonos në Athinë të Greqisë, pas tentativës për të grabitur një bankë.
Ngjarja ka ndodhur mëngjesin e kësaj të marte në rrugën “Palamidi” dhe sipas mediave greke, policia u njoftua për një grabitje.
Sipas mediave greke, autori Elton Thoma Zoto, i datëlindjes 1985 nga Delvina, hyri fillimisht në bankë dhe nën kërcënimin e një thike mundi të grabisë rreth 4.000 euro.
Në vazhdim, ai tentoi të largohet, por policia ishte më pak se 50 metra nga vendi i grabitjes dhe sapo ra alarmi, dy policë vrapuan për të parë nga afër shkakun e alarmit.
Mediat raportojnë se ata panë shqiptarin Zoto që po tentonte të largohej me një motor. Menjëherë filloi ndjekja dhe rreth 300 metra më tej, policët e rrëzuan autorin në tokë.
I armatosur me thikë, Zoto goditi njërin prej policëve, duke e plagosur lehtë, ndërsa një tjetër polic qëlloi me armën e shërbimit dy plumba mbi Zoton, duke e lënë të plagosur rëndë.
Ai u dërgua në spital dhe po lufton për jetën, ndërsa polici që qëlloi mbi të u ndalua me urdhër të prokurorisë deri në sqarimin e rrethanave.
Elton Zoto rezulton me precedent penal në Greqi. Ai është skeduar për krime që kanë lidhje me drogën.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
