.png)
Gazeta Si – Katër persona janë ndaluar në lidhje me ngjarjen e ndodhur mbrëmjen e të dielës në Palasë, ku dyshohet se u qëllua me armë zjarri nga një jaht.
Në një njoftim për mediat, policia njofton se ka kapur jahtin nga ku dyshohet se është qëlluar dhe janë shoqëruar 4 personat që ndodheshin në bord, Bruno Çela, 31 vjeç, Leonard Hasa, 31 vjeç, Afrim Kastrati, 49 vjeç dhe Pashk Gjini, 60 vjeç.
Duke qenë se në jaht nuk u gjet asnjë send i kundraligjshëm apo diçka që të provojë se ishin ata që shkaktuan panik te pushuesit me të shtënat, policia i ka lënë të lirë.
Operacioni për kapjen e jahtit zgjati për afro dy orë dhe në të u angazhuan Policia Kufitare, së bashku me Delta Force dhe FNSH-në.
Bëhet me dije se jahti fillimisht kishte marrë drejtimin për në Greqi, por më pas ndryshoi kurs. Gjatë ndjekjes, njëri prej personave në bord u hodh në det dhe u kap më pas nga Policia Kufitare.
Gjatë operacionit, dy nga personat që ndodheshin në bordin e jahtit, tentuan të afroheshin në breg me gomone për t’i ikur policisë. Por, pasi konstatuan praninë e efektivëve në tokë, ata u kthyen sërish drejt jahtit.
Sipas të njëjtave burime, në përpjekje për t’iu shmangur autoriteteve, jahti fiku dritat dhe vijoi lëvizjen në det.
Ende nuk dihen rrethanat pse kanë ndodhur të shtënat apo tentativa e personave të ndaluar për t’i shpëtuar policisë. Po ahtu, mbetet mister fakti se në jaht nuk u gjet asnjë armë apo send i paligjshëm gjatë kontrolleve të policisë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje