Doni të bëni biznes? Në Shqipëri është më keq se një vit më parë!
Ky është me pak fjalë përfundimi i raportit të fundit të Bankës Botërorë “Doing Business 2020”.
Në këtë raport Shqipëria renditet e 82-ta nga 190 ekonomi të analizuara për të bërit biznes, por ajo që shqetëson është rënia me 19 vende nga viti i kaluar.
Shqipëria është në vendin e tretë nga fundi ndër vendet e Europës, dhe e fundit në rajon.
Një vit më parë, Shqipëria mbante vendin e 63-të.Pas vitit 2013-të Shqipëria ka patur luhatje në renditjen e këtij raporti. Në 2014 është renditur e 90-ta, në 2015-ën e 68-ta, një vit më pas e 97-ta, në vitin 2017-të e 58-ta, në 2018-ën e 65-ta.
Banka Botërore në pjesën për Shqipërinë evidenton faktin se reformat kanë ndikuar që në Shqipëri është më e lehtë të bësh biznes gjatë vitit të fundit, por ndryshimet e shpeshta ligjore e vështirësojnë punën e sipërmarrjes në Shqipëri.
Performanca më e dobët për ekonominë shqiptare i faturohet lejeve të ndërtimit, duke na renditur në vendin e 166-të në botë, nga vendi i 151-të i një viti më parë. Mbrojtja ndaj investitorëve të minoritetit shfaq rënie drastike si tregues.
Për këtë tregues nga vendi i 26-të në botë vitin e kaluar, renditemi këtë vit në të 111-tin. Edhe tregeusi i kontratave, ka pësuar përkeqësim të madh.
Për pagimin e taksave renditemi në vendin e 123-të në botë, kurse për hapjen e një bizneis në vendin e 53-të nga vendi i 50-të një vit më parë.
Përmirësim kemi vetëm në përfitimin e energjisë, nga vendi i 140-të në të 107-tin.
Mes 10 treguesëve rezultojmë të jemi përmirësuar vetëm në një.
Çfarë është e re në studimin e këtij viti?
Të bësh biznes 2020 përmban tre studime të rastit — për reformat rregullatore të biznesit në katër grupe treguesish (fillimi i një biznesi, marrja e kredisë, pagimi i taksave dhe zgjidhja e falimentimit), mbi kontratat me qeverinë dhe punësimin e punëtorëve. Studimi i rastit mbi reformat analizon ndryshimet e rëndësishme rregullatore të zbatuara nga qeveritë që nga fillimi i këtij viti.
Ndër ndryshimet më të zakonshme rregullatore gjatë 17 viteve të fundit janë thjeshtimi i kërkesave për të krijuar një kompani, lehtësimi barrës fiskale dhe rritja e respektimit ndaj taksave, rritja e aksesit në kredi dhe zhvillimi i qëndrueshëm i bizneseve.
Një tregues i rëndësishëm është edhe efikasiteti i prokurimit publik. Në të gjithë botën, prokurimi publik përbën mesatarisht 10-25% të PBB, dhe qeveritë harxhojnë 10 trilion dollarë për kontratat publike çdo vit. Efikasiteti i procesit ndryshon në mënyrë të konsiderueshme; aktualisht, nuk ka të dhëna globale për të krahasuar praktikat e tilla.
Të bërit biznes analizon disa dimensione të rëndësishme të mjedisit rregullator që prekin firmat vendase. Ai siguron tregues sasiorë për rregullimin për fillimin e një biznesi, trajtimin e lejeve të ndërtimit, përfitimin e energjisë elektrike, regjistrimin e pronës, marrjen e kredisë, mbrojtjen e investitorëve të pakicave, pagimin e taksave, tregtimin përtej kufijve, zbatimin e kontratave dhe zgjidhjen e falimentimit. Të bësh biznes gjithashtu mat aspektet e punësimit të punëtorëve dhe kontratave me qeverinë (prokurimin publik), të cilat nuk përfshihen në renditje.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
