.png)
Nga Gazeta 'Si'-Sulmet kibernetike që goditën sistemin tonë të të dhënave, kanë shtuar alarmin tek kompanitë publike e private të cilat kanë filluar menjëherë trajnimet e stafeve.
Burime për Gazetasi.al thanë se pre e sulmit kibernetik kanë rënë dhe disa kompani publike që zotërojnë të dhëna të rëndësishme për qytetarët, që kanë të bëjnë me shërbimet, por përforcimi i masave paraprake ka bërë që të mos ketë dëme nga ky sulm.
Për të rritur sigurinë kibernetike, nga ana e kompanive kanë nisur trajnimet e stafit për mënyrën se si duhet të jenë të përgatitur përballë sulmeve.
Kështu, punonjësve i është tërhequr vëmendja fillimisht që të fiken kompjuterat me përfundimin e orarit zyrtar.
Po ashtu, punonjësve u është kërkuar që të mos navigojnë në faqe të dyshimta, duke u hequr aksesin në internet, përveçse në zyra dhe drejtues të kompanive që kanë nevojë imediate për internetin.
Gjithashtu, punonjësve u është thënë se nuk duhet të klikojnë në linqe që mbërrijnë në emailet e punës apo private, pasi rrezikojnë të jenë viruse që mund të sjellin dëme në kompjuter, në sistemin e të dhënave personale etj.
Burimet i thanë Gazetasi.al se rreziku më i madh nga sulmet mbetet fundjava, ku nëse neglizhon masat e sigurisë, sistemi rrezikon të bjerë në kolaps.
Prej periudhës kur hakerat iranianë goditën sistemin e të dhënave, për punonjësit e IT në institucionet publike e private, nuk ka pushim.
Gjatë fundjavës, puna vijon njësoj duke mbikqyrur sistemin dhe duke mos neglizhuar asnjë masë sepse sulmet kibernetike janë prezente.
Si pasojë e këtyre sulmeve, kompanitë kanë shtuar trajnimet me punonjësit e sektorit të IT me programues, informaticienë, që të njihen me programet, masat më bashkëkohore për të qenë koherent me situatën dhe për të rritur nivelin e sigurisë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
