.png)
Shirat e rrëmbyeshëm të rënë në orët e vona të natës së mbrëmshme kanë shkaktuar probleme serioze në disa qarqe të vendit. Në qarqet Durrës, Lezhë, Tiranë, Gjirokastër, Kukës, si në qarkullim me makina apo dhe në përmbytje të dhjetëra shtëpive dhe banesave, si rezultat edhe daljes së shtretërve të lumit.
Dhjetëra shtëpi e biznese janë përmbytur në territorin e Krujës, të Fushë Krujë e Kurbin si pasojë e reshjeve me intensitet të lartë që kanë përfshirë vendin prej mbrëmjes së djeshme. Situata më problematikë është tek Ura e Gjolës në Fushë Krujë, ku lumi ka dalë nga shtrati duke përmbytur katet e para të banesave aty pranë. Banorët janë sistemuar përgjithësisht në katet më të larta të banesave, por situata po përkeqësohet.
Dhjetëra hektarë tokë janë nën ujë në fshatrat e dy bashkive, ku niveli i ujit arrin mbi 20 centimetra. Vështirësi ka edhe në aksin nacional Krujë- Fushë Krujë, pranë vendit të quajtur Krastë. Reshjet e dendura kanë mbuluar edhe rrugën nacionale Tiranë-Shkodër, në segmentin e Milotit dhe të Mamurrasit, duke ndikuar në lëvizjet e makinave. Dalja e lumit Derven ka krijuar probleme në rrugën nacionale.
Fshatrat e Fushë Krujës janë përmbytur duke dëmtuar dhjetëra shtëpi, biznese dhe tokat e tyre. Banorët kanë kërkuar ndihmë që në orët e para të mëngjesit nga Policia e Krujës por askush nuk u është përgjigjur. “Kam që në orën 6 që kam kërkuar Policinë e Krujës, që policia të njoftojë Bashkinë. Nuk ka ardhur asnjë deri tani. Kam një metër ujë brenda në lokal dhe në shtëpi. Ju lutem kërkojmë ndihmë nga Emergjencat Civile. Fëmijët rrinë mbi soletë. I kërkojmë Ministrisë së Bujqësisë që urgjentisht të hapin kanalet”, thotë një nga banorët e dëmtuar.Një tjetër banor teksa dëshmon se askush nuk i hap telefonin pasi ka kërkuar ndihmë, thotë se uji në shtëpinë e tij ka arritur deri në 2 metra. “Kam marrë familjen, fëmijët, gruan dhe i kemi nxjerrë të gjitha jashtë. Urdhëro ku është faktike”.
Autoriteti Rrugor Shqiptar njofton se në rajonin jugor, ka pasur reshje të shumta sidomos në qarkun e Gjirokastrës. Në Dragot dhe pranë Ujit të ftohtë ka pasur vërshim ujërash dhe dherash, kompania e mirëmbajtjes ka punuar gjatë natës duke kthyer qarkullimin normal. Në veri, probleme ka ne disa rrugë për shkak të rrëshqitjes së dherave si në rrugën Kukës-Shishtavec, Bajram-Curr-Valbonë dhe në Lekbibaj.
Nata e mbrëmshme është shoqëruar përsëri me reshje të dendura shiu në të gjithë territorin dhe kjo ka shkaktuar jo pak probleme me qarkullimin rrugor. Sipas ARRSH-së, në Rajoni Verior k pasur reshje në të gjithë territorin, po pa shkaktuar probleme në qarkullim. Të gjithë specialistët dhe kontraktorët janë në terren në gatishmëri për çdo situatë. Si rezultat i reshjeve të shumta në segmentet e zonës së Dajtit të Tiranës nga reshjet ka rënie gurësh e dherash është punuar për pastrimin e tyre. Rrugët dytësore dhe segmentet e Kamzës kanë pasur disa vështirësi në qarkullim (te nënkalimi i City Park).
Tani situata është e normalizuar. Grupet e punës janë përqendruar në Bubq - Ishem. Në zonën e Ibës ka pasur rënie të dendura shiu kontraktori ka punuar për stabilizimin e situatës. Në segmentet rrugore të zonës se Belshit, si rezultat i shirave të dendur në disa vende ka rënie gurësh. Kontraktori po punon për pastrimin e plotë të rrugës. ARRSH bën të ditur se në të gjitha akset e këtij rajoni qarkullimi kryhet normalisht. Në rajonin jugor ka pasur reshje të shumta sidomos në qarkun e Gjirokastrës. Në Dragot dhe pranë Ujit të ftohtë ka pasur vërshim ujërash dhe dherash, kompania e mirëmbajtjes ka punuar gjatë natës duke kthyer qarkullimin normal. Aktualisht në Rajonin Jugor të gjitha akset janë me qarkullim normal. Kontraktorët janë në gatishmëri për çdo situatë të përkeqësuar të motit. ARRSH i bën apel të gjithë drejtuesve të mjeteve të bëjnë kujdes, të ulin shpejtësinë të respektojnë sinjalistikën dhe udhëzimet e policisë rrugore. Si rezultat i vërshimit të ujit rrugët janë mbushur me dhera dhe punonjës po punojnë për largimin e tyre.
Në Tiranë përmbytje te bizneset, mbyllen 3 shkolla
Prej mesditës të së hënës, Tirana është përfshirë nga moti i keq, me reshje të dendura shiu, stuhi të forta dhe rrufe. Në një kohë shumë të shkurtër, prej orës 12:00 të 23 shtatorit dhe deri në orën 6 të mëngjesit të sotëm, nga matjet e kryera rezulton se në kryeqytet ka rënë një sasi e konsiderueshme shiu, plot 115 mml. Banorët e Tiranës kanë pasur jo pak probleme me banesat e tyre pasi i ka hyrë uji brenda. Edhe një biznesi në zonën e Kombinatit i ka kushtuar probleme jo të pakta, pasi sot në mëngjes kanë gjetur magazinën e mbushur me ujë. Oborret e tre shkollave të Tiranës janë përmbytur për shkak të reshjeve të shiut të mbrëmjes së djeshme. Ministrja e Arsimit, Besa Shahini informon se janë nën ujë oborret e shkollës 9-vjeçare “Sabaudin Gabrani”, shkollës 9-vjeçare “Yzberisht” dhe shkollës 9-vjeçare Lalm Si pasojë, sot në këto shkolla nuk bëhet mësim.
Drejtoresha e shkollës Sabaudin Grabani, Astasi Kerri tha se mori vendimin për pezullimin e mësimit për shkak të frikës së ndonjë epidemie. “"Uji nuk është futur fare as në verandën e shkollës. Kemi vendosur pezullimin e procesit mësimor jo sepse shkolla është përmbytur, por se fëmijët do lageshin si dhe për të parandaluar ndonjë epidemi. Nuk mund të fusnim fëmijët e vegjël, mbi 1000 fëmijë nga mosha 5- 11 vjec në shkollë pasi do të lageshin. Ujërat kanë dalë nga Lana dhe nuk mund të fusja nxënësit brenda në shkollë", theksoi Kerri.
"Ekipet e Bashkisë dhe Ministrisë janë duke punuar në terren. Dita e mësimit sot do të zëvendësohet në një ditë tjetër ndërsa po përpiqemi që këto shkolla të hapen nesër”, informon ministrja Shahini në një postim në Facebook. Ish-deputeti demokrat Klevis Balliu ka postuar disa foto dhe video nga zonat e përmbytura në Tiranë, duke akuzuar bashkinë se nuk ka po ndërmerr asnjë masë, si dhe pusetat janë bllokuar për shkak të bllokimit nga pallatet e kullat e larta.
Në zonën e Shkozës situata është problematike, pasi balta dhe uji kanë përmbytur disa banesa, që preken nga projekti i Unazës së madhe. Përmbytjet kanë ardhur edhe si rezultat i daljes nga shtrati i lumit të Lanës në këtë zonë, ku prekur dhjetëra banesa. Kreu i Bashkisë, Erion Veliaj, përmes një postimi në “Twitter” thotë se kjo sasi reshjesh është sa për të gjithë muajt e fundit bashkë në Tiranë, ndërohë që bën apel për sa më shumë solidaritet.
Përgjatë javës meteorologët parashikojnë shira dhe kohë me vranësi deri të premten. Shërbimi Meteorologjik Ushtarak theksoi se reshjet e shiut në formën e shtrëngatave e stuhive ushtruan aktivitetin e tyre mbrëmë në qytetet Tiranë, Lezhë, Elbasan. Sasia më e madhe e reshjeve është regjistruar në qytetin Lezhës me 53.0 mm, Shkodrës me 26.0mm, Tiranës 20.0mm. Kjo situatë është shoqëruar edhe me erë të vrullshme deri në 15-18 m/sek. Ndërsa mbrëmë në 10 minuta ka pasur 290 shkarkesa elektrike.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
