Pas 5 muajsh, sot janë rikthyer protestat studentore. Siç edhe kishin paralajmëruar një pjesë e studentëve, ata janë grumbulluar para Ministrisë së Arsimit, Rinisë dhe Sporteve. Qëllimi i kësaj proteste, sipas studentëve, është të kërkojnë llogari për premtimet e qeverisë, të cilat nuk janë përmbushur pas protestave të dhjetorit. Ajo që u vu re, ishte pjesëmarrja e paktë në këtë protestë.
Para Ministrisë ata kanë hedhur tymuese dhe gurë duke thyer disa xhama të ndërtesës së këtij digasteri, ndërsa janë shprehur se nuk janë partiakë. Me thirrjet e “E duam Shqipërinë si e gjithë Europa”, ata u shprehën se asnjë nga 8 pikat nuk është plotësuar.
Një prej studentëve, nismëtar të protestës së sotme ishte edhe Dorjan Beqiri nga Fakulteti i Shkencave të Natyrës dhe anëtar i Këshillit Studentor. Ai tha për Gazetën “Si” se ka dalë sërish në protestë pasi asnjë nga pikat e kërkuara në janar nuk janë plotësuar.
“Pas kësaj u detyruat të zhvillonim një protestë tjerët dhe do të bëjmë protestë sa herë të jetë e nevojshme për të mirën e arsimit. Nuk është një protestë e stisur politikisht për aq sa jemi të rinjtë e këtij vendi, kemi të drejtë të protestojmë për të drejtat tona. Në fund të ditës jemi studentë, jemi bijë nënash dhe baballarësh që nuk kanë lidhje me partitë. Partitë kanë detyrat e tyre dhe funksionet e tyre. Ne sot jemi student dhe protesta jonë është pa përkatësi,”shtoi ai.
Këtë herë studentët kanë paraqitur 5 kërkesa të cila u cituan shpesh herë nga Beqiri. Në pikat e tyre parashtrohej: Rrëzimi i ligjit të arsimit të lartë; Arsim cilësor për të gjithë të rinjtë duke mundësuar mbështetje financiare në të dyja ciklet; Rankim të programeve sipas modeleve më të mira bashkëkohore; Rritje e peshës së përfaqësimit në institucionet e arsimimit të lartë; Autonomi reale e IAL dhe jo e diktuar nga bordet qeveritare.
“U rikthyem pasi të gjitha ato letrat e bardha që dogjëm ishte gjithçka që qeveria ofron, çdo gjë është e bardhe dhe nuk ka asnjë zgjidhje për studentët. Unë jam një student ekselence dhe nuk më intereson nëse penalizohem. Ne kemi vendosur të qëndrojmë në Shqipëri, në qoftë se situata shkon tej e këtej atëherë i bie të jemi komunistë. Kur nuk kanë turp socialistët që mbytën Shqipërinë, pse duhet të kemi turp ne të tjerët që jemi popull i thjeshtë,” shprehet Jurhan Hoxhaj, nga Fakulteti i Drejtësisë.
Numri i studentëve nuk ishte i madh, por ata brohorisnin njëkohësisht, duke bërë thirrje edhe ndaj studentëve të tjerë, duke i ftuar të bashkoheshin me ta për të protestuar për të drejtat e tyre dhe për kërkesa që sipas tyre, nuk do të plotësoheshin kurrë. Një ndër thirrjet e tyre për studentët ishte “ejani protestoni sa nuk është vonë”. Duke shprehur pakënaqësinë e tyre në forma të ndryshme, studentët përballë ministrisë shprehen se janë të zhgënjyer nga të gjitha vendimet e qeverisë.
Burime për Gazetën “Si”, kanë bërë me dije se kjo protestë ishte e nxitur nga pedagogë nëpër fakultete të ndryshme, që janë pjesë e grupeve partiake. Por kjo gjë nuk është e pranuar kurrsesi nga studentët që endeshin në Rrugën e Durrësit.
Ambra Nazarko, një prej tyre, u shpreh se në fund të janarit, kur studentët u ngujuan nëpër universitete, bënë paralajmërime për kryeministrin dhe të gjithë Shqipërinë se do të dilnin përsëri në protestë, pas mbylljes së sezonit dhe tashmë kishte ardhur koha.
“Sot jemi këtu pasi asnjë nga kërkesat nuk është plotësuar, pakti për universitetin është thjeshtë një fasadë dhe nga pakti nuk është plotësuar asnjë pikë, ndaj jemi këtu për të adresuar kërkesat Ministrisë së Arsimit dhe në qoftë se ajo nuk plotëson, ia drejtojmë edhe vetë kryeministrit,” shprehet Nazarko. Ndër të tjera, ajo u shpreh se nuk është marrë ende një vendim i qartë se si do të vazhdohen protestat. Por nëse nuk dëgjohet zëri i studentëve, protesta do të masivizohet më shumë se sa ajo e dhjetorit.
Ndërkohë, më herët kryeministri Rama ka shpërndarë në faqen e tij zyrtare në “Facebook” një video, e cila tregon sipas tij premtimet e mbajtura në lidhje me “Paktin e Universitetit”.
Lidhur me këtë, një grup studentësh të Fakultetit të Shkencave të Natyrës në Tiranë, u shprehën se realizimi i Paktit të universitetit, ka mbetur vetëm një monolog i kryeministrit, sepse universitetet nuk e kanë pranuar pasi cenon autonominë e universitetit.
“Pakti do të thotë se pesë anëtarë të bordit në universitet i zgjedh qeveria dhe katër janë nga universiteti dhe i bie që çdo vendim vjen direkt na Ministria. Nuk është absolutisht e vërtetë që jemi partiak, ne kemi dalë të protestojmë për kushtet e këqija në auditore dhe konvikte, për mungesën e praktikës dhe laboratorëve. Janë një sërë arsyesh që na sjellin përsëri këtu,” u shprehën ata.
Pjesë e kësaj proteste ishin përsëri edhe disa gjimnazistë, nga gjimnaze të ndryshme në Tiranë. Njëra prej tyre u shpreh se protestat e studentëve, duhet të vazhdojnë për shkak se sistemi arsimor në Shqipëri është i vështirë. Duke nisur nga tarifat e larta dhe deri tek informimi që kanë maturantët, asgjë nuk funksion.
“Unë protestoj si një qytetare e këtij vendi, si një njeri që do të ndryshojë diçka dhe si një e re që proteston dhe për atë pjesë të njerëzve që duan të protestojnë, por nuk munden pasi kanë frikë se mos i heqin nga puna,” thanë ata.
Njëjtë me studentët e Tiranës, edhe studentët e universitetit Fan S. Noli në Korçë kanë deklaruar se në ditët e ardhshme do të bojkotojnë orët e mësimit, për të kërkuar të drejtat e tyre.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.