Ambasadorja e SHBA në Tiranë, Yuri Kim e interpreton vendimin e Gjykatës së Strasburgut që rrëzoi pretendimet e ish-anëtares së Gjykatës Kushtetuese, Altina Xhoxhaj si provë që procesi i vettingut është i drejtë.
“Procesi i vettingut që çoi në shkarkimin e gjyqtares kushtetuese ishte i ndershëm dhe shkarkimi (i Xhoxhajt) i drejtë”, shkruan Kim.
Në deklaratat e shpeshta për reformën në drejtësi, kryediplomatja amerikane ka pranuar se kjo reformë nuk ka qenë perfekte, ka qenë e ngadaltë dhe me të papritura rrugës. Por, ka theksuar Kim, ajo duhet të vazhdojë të ecë përpara për të ngritur një sistem drejtësie të pavarur dhe të aftë për të luftuar krimin e organizuar dhe korrupsionin në nivelet e larta.
Progresi në luftën ndaj këtyre dy fenomeneve është nxitur vazhdimisht nga Ambasada e SHBA në Tiranë, por edhe nga Bashkimi Europian, që i ka vendosur edhe mes kushteve për hapjen e kapitujve të negociatave.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
