.png)
Në Pekin triumfojnë “Furitë e kuqe”. Spanja është kampione bote në basketboll për meshkuj, pasi ka mundur 95-75 Argjentinën e Skolës me shokë. Trajneri italian i iberikëve, Skariolo, pas triumfit me Raptors në NBA, fiton edhe titullin kampion bote në krye të Spanjës, kurse Rubio shpallet lojtari më i mirë i turneut.
Një kryevepër e Spanjës në finale, pasi kishte hequr qafe Serbinë pretendente në çerekfinale. Triumf i një skuadre që u rrit me kalimin e ndeshjeve në Botërorin e Kinës. Një arritje historike për Mark Gasol dhe Rudi Fernandez, pas suksesit të 2006-ës. I pari, me shumë inteligjencë, ka udhëhequr mbrojtjen (14 pikë, 7 ribaunde, 7 asiste), ndërsa i dyti ka fituar në të njëjtën kohë titullin në NBA dhe Botërorin. Historike edhe për Riki Rubion, i zgjedhur lojtari më i mirë i Botërorit. Argjentinës së Luis Skolës i mbetet shija e hidhur e gabimit në një ndeshje të vetme, por në më të rëndësishmen.
Mbrojtja është çelësi i suksesit të Spanjës, një skuadër e kolauduar, pavarësisht ndërrimit të gjenerateve. Nuk ka një hero të vetëm. Të gjithë kanë bërë më të mirën, Rubio, Gasol, Fernandez, Lul e kështu me radhë. Lot tek Argjentina, që zhvilloi një Botëror të jashtëzakonshëm, por dështoi në momentin final. Nisja e Spanjës ishte monstruoze, 14-2, më pas reagim i Argjentinës, por pa pasur forcën për ta përmbysur ndeshjen. Skuadra e trajnerit Skariolo kontrolloi gjithçka me shumë kujdes, duke ruajtur distancën dhe në fund e ka merituar plotësisht medaljen e artë.
Spanja: Rubio 20 pikë, Lul 15, Gasol 14
Argjentina: Dek 24 pikë, Laprovitola 17, Kampazo 11
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
