Gazeta Si – Që pas humbjes së thellë me Dinamon, Erzeni pritej të ndryshonte trajnerin dhe kështu ka ndodhur. Skerdi Bejzade ka marrë drejtimin e shijakasve, kurse Alfred Deliallisi, trajneri i deritanishëm, ka kaluar në postin e drejtorit sportiv.
Për Bejzaden do të jetë aventura e dytë këtë sezon në Superiore. Ai drejtoi për pak javë Laçin gjatë gjysmës së parë të sezonit. Tani merr drejtimin e Erzenit në një moment të vështirë, ku kjo skuadër duhet të luftojë fort për të qëndruar në Superiore edhe sezonin e ardhshëm.
Erzeni mban aktualisht vendin e 8-të në tabelën e renditjes. Pozicion ky që të çon në ndeshjen shtesë me një kundërshtar nga Kategoria e Parë. Rreziku për të zbritur në dyshen e fundit të renditjes është evident, ndaj dhe drejtuesit e klubit shijakas kanë vendosur të ndryshojnë trajnerin.
Gara për mbijetesë duket se do të jetë mes Erzenit, Kukësit, Teutës dhe ndonjë skuadre tjetër, ku dy të fundit bien direkt dhe e 3-ta në fundi shkon në ‘Play-off’. Bejzade do të debutojë në stolin e Erzenit në ndeshjen me Tiranën këtë fundjavë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
