Pas vendimit të autoriteteve greke për të kërkuar vetëizolim 7 ditor dhe çertifikatë të testit negativ për të gjithë shtetasit që kalojnë nga Shqipëria në Greqi duke nisur nga data 17 gusht, gjatë dy ditëve të fundit ka pasur një fluks të shtuar qytetarësh në pikat e kalimit kufitar, duke sjellë një situatë kaotike me radhë kilometrike në Kakavijë dhe Kapshticë.
Pas situatës së krijuar, Ministria për Evropën dhe Punët e Jashtme është vënë në kontakt me palën greke dhe fillimisht u bë i mundur shtimi i testimeve të kryera në pikat kufitare prej 200 testimesh në orë, ndërsa ka filluar të shtohet edhe më shumë me kalimin e orëve.
Testimi vijoi pa ndërprerje, për të gjithë qytetarët që kërkojnë të kalojnë nga Shqipëria në Greqi.
“Ndërkohë, nga autoritetet greke na është premtuar shtimi i mëtejshëm i kapaciteteve testuese në orët në vijim.
Po ashtu, jemi në bisedime për të zgjatur orarin e punës në pikat kufitare, në mënyrë që qytetarët të mund të kalojnë edhe në orë e vona të natës”, thuhej në njoftimin e sotem te Ministrisë së Jashtme.
Ministri në detyrë për Evropën dhe Punët e Jashtme, Gent Cakaj, zhvilloi edhe një bisedë telefonike për cështjen në fjalë me ministrin e jashtëm alternat të Greqisë, Varvitsiotis.
Përmes një postimi në Twitter, Cakaj bëri me dije se kanë diskutuar për lehtësimin e kalimit kufitar në Kakavijë.
"Duke respektuar të gjitha masat dhe forcimin e grupeve që punojnë në kufi, ne jemi duke ndjekur vazhdimisht situatën për të lehtësuar ngarkesën në kufi", tha ai.
Gjatë mbrëmjes pala greke konfirmoi se do të punojë edhe natën. Por më vonë, autoritetet njoftuan se do të mbyllnin kufirin pasi nuk kishin më staf, për të rifilluar punën nesër në mëngjes.
Ministria e Shëndetësisë dhe Ministria e Mbrojtjes vendosi në dispozicion të qytetarëve të bllokuar në radhë disa ekipe mjekësore dhe autoambulanca, si dhe shërbime higjenosanitare.
Ministrja Xhacka ishte ne Kakavijë për të parë gjendjen nga afër, ndërsa efektivë të Batalionit të Mbështetjes Rajonale të FA në Gjirokastër çuan aty 10 mijë litra ujë
Me heret, gjate dites duke publikuar një video mbi situatën kaotike të krijuar në Kakavijë dhe radhët kilometrike të emigrantëve shqiptarë në pritje për të bërë testin e tamponit, Presidenti Ilir Meta, komentoi se situata ishte vërtet shqetësuese.
Ai i bëri thirrje qeverisë dhe ministrisë së Jashtme që të vendosin kontaktet me palën greke me qëllim lehtësimin e lëvizjes së qytetarëve në anën tjetër të kufirit.
“Thellësisht i shqetësuar për situatën në të cilën ndodhen qytetarët shqiptarë të cilët vijojnë të jenë të bllokuar prej shumë orësh në pikën kufitare të Kakavijës, duke u ekspozuar seriozisht para rrezikut të përhapjes së pandemisë COVID-19.
I bëj thirrje urgjente Qeverisë dhe Ministrisë për Europën dhe Punët e Jashtme, të vendosin kontaktet me palën greke, për të marrë të gjitha masat për lehtësimin dhe garantimin e lëvizjes së lirë të qytetarëve në anën tjetër të kufirit.
Zgjidhja duhet të jetë e menjëhershme!”, komentoi Meta në faqen e tij Facebook.
Për situatën e krijuar pati reagim tjeter nga Ministria e Jashtme.
“Me qëllim përballimin e situatës dhe lehtësimin e lëvizjes që qytetarëve shqiptarë janë kontaktuar në vijimësi autoritetet greke të cilët kanë shtuar personelin shëndetësor në Pikën Kufitare të Kakavijës.
Së fundi pala greke ka njoftuar se do të marrë masa të tjera për lehtësimin e situatës deri në heqjen e detyrimit për bërjen e testit.
Risjellim në vëmendje se shtetasit shqiptarë mund ta kryejnë testin edhe në institucionet e licencuara shqiptare dhe ta përkthejnë përgjigjen në anglisht.
Ky testim njihet edhe nga autoritetet greke dhe do ta lehtësonte më shumë situatën”, thuhej në reagim.
Edhe qeveria greke njoftoi se prej datës 17 gusht, për hyrjen në Greqi do të duhet tamponi i kryer në një prej laboratorëve ose qendrave të çertifikuara.
Autoritetet greke paralajmërojnë këdo që tenton të pajiset me test të falsifikuar, se do të ndiqet penalisht dhe përballja me ligjin do të jetë e ashpër.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.