.png)
Gazeta Si – Familja e Suel Çelës në Itali, ka kallëzuar ish-kreun e SPAK, Altin Dumani, pas një operacioni të përbashkët shqiptaro-italian që çoi në sekuestrimin e pasurive të tyre me vlerë rreth 4 milionë euro në Verona.
Mediat italiane raportojnë se, pasuritë u sekuestruan në korrik 2025 nga SPAK dhe Guardia di Finanza, nën dyshimin se ishin blerë me të ardhura nga aktivitete të paligjshme, përfshirë trafikun e kokainës.
Bëhej fjalë për një ndërtesë në rrugën Murari Bra, ku ndodheshin rreth 30 ambiente tregtare dhe zyra, si dhe një kompleks në Nogarole Rocca, në pronësi të kompanisë Meral Srl, të lidhur me familjen Çela.
Megjithatë, më 4 gusht 2025, gjyqtarja e hetimeve paraprake në Verona, Paola Vacca, vendosi anulimin e masës së sekuestrimit dhe kthimin e pasurive te pronarët.
Sipas vendimit, dokumentacioni i paraqitur nga mbrojtja tregonte se pasuritë ishin blerë me të ardhura nga aktivitete të ligjshme.
Pas këtij vendimi, përfaqësuesi ligjor i Meral Srl kallëzoi për “kallëzim të rremë” ish-kreun e SPAK, Altin Dumani.
Prokuroria e Veronës kishte kërkuar fillimisht arkivimin e çështjes, por gjyqtari Enrico Zuccon vendosi kryerjen e hetimeve shtesë.
Autoritetet italiane pritet të verifikojnë dokumentacionin e dërguar nga Shqipëria, si dhe nëse autoritetet shqiptare kishin dijeni për vendime të mëparshme lidhur me hetimet ndaj familjes Çela.
Mbrojtja e Dumanit ka kërkuar sërish arkivimin e çështjes, duke argumentuar se kallëzimi synon të ndikojë në hetimet e ardhshme të prokurorit shqiptar.
Për momentin, çështja mbetet e hapur, ndërsa Prokuroria e Veronës ka dy muaj në dispozicion për kryerjen e verifikimeve, përpara se palët t’i rikthehen gjyqtarit.
Reagimi i SPAK
Prokuroria e Posaçme (SPAK) ka reaguar pas lajmit të publikuar në mediat italiane në lidhje me padinë e familjes së Suel Çelës.
Në një njoftim zyrtar, SPAK thotë se shtetasi Petrit Çela, i është drejtuar drejtuesit të SPAK Klodian Braho më 20 maj dhe 18 qershor 2026, me kërkesë për përjashtimin e prokurorit Altin Dumani nga procedimi penal nr. 193/2023, ku të pandehur janë Marjus Lulaj dhe Mario Çela, familjarë të Petrit Çelës.
SPAK bën me dije se në Prokurorinë e Veronës është regjistruar një procedim penal për veprën penale të “shpifjes” sipas Kodit Penal italian, mbi bazën e kallëzimit të bërë nga Petrit Çela ndaj Altin Dumanit pasi kërkesa për përjashtimin e tij, i ishte refuzuar.
Hetimet e SPAK
Sipas hetimeve të SPAK, grupi kriminal ishte përgjegjës për transportin e sasive të mëdha të kokainës nga Amerika e Jugut në tregun europian.
Kjo shënon herën e parë që SPAK ka bërë sekuestrim të pasurive të krimit të organizuar jashtë territorit të Shqipërisë.
Suel Çela konsiderohet si kreu i një organizate kriminale në Elbasan. Ai ndodhet në kërkim nga SPAK pas hetimeve për dhjetëra ngjarje kriminale në Shqipëri dhe pastrim parash nga trafiku i drogës.
Nga ana tjetër, Mario Çela u ekstradua para disa mujsh nga Belgjika në Shqipëri, i akuzuar mbi dyshimet për përfshirje në një vrasje mafioze në Antwerp, si pasojë e konflikteve mes grupeve rivale të trafikut të drogës.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje