.png)
Raporti World Risk Index e rendit Shqipërinë në vendin e 81-të në botë për rrezikun nga fatkeqësitë natyrore. Në Europë, 13 vende përfshihen në 100 vendet me rrezikun më të lartë, ndërsa ndryshimet klimatike po rrisin intensitetin e disa prej ngjarjeve ekstreme.
Në renditjen globale, Shqipëria mban vendin e 81-të, në një listë ku rreziku nuk lidhet vetëm me një lloj fatkeqësie, por me ekspozimin ndaj rreziqeve natyrore dhe cenueshmërinë e shoqërisë përballë tyre.
Në të njëjtën listë përfshihen edhe Turqia në vendin e 38-të, Italia në të 51-in, Greqia në të 56-in, Spanja në të 58-in, Franca në të 78-in, Polonia në të 82-in, Portugalia në të 86-in, Mbretëria e Bashkuar në të 89-in, Kroacia në të 92-in, Belgjika në të 94-in, Holanda në të 96-in dhe Gjermania në të 99-in.
Shqipëria në një Europë gjithnjë e më të ekspozuar
Të dhënat vijnë në një kohë kur ndryshimet klimatike po ndryshojnë karakteristikat e disa prej ngjarjeve ekstreme.
Sipas WorldRiskReport, stuhitë shkaktojnë dëmin më të madh ekonomik krahasuar me ngjarjet e tjera ekstreme natyrore. Ato renditen gjithashtu ndër shkaqet kryesore të viktimave nga fatkeqësitë natyrore.
Shkencëtarja e klimës Friederike Otto, bashkëthemeluese e World Weather Attribution, thekson se po rritet përqindja e stuhive më të fuqishme. Sipas saj, ngrohja e atmosferës dhe e oqeaneve u jep cikloneve tropikale më shumë energji, duke favorizuar erëra më të fuqishme dhe reshje më intensive.
Për Europën, rreziku nuk lidhet vetëm me ciklonet tropikale. Ciklonet ekstratropikale janë shumë më të zakonshme dhe ndikojnë drejtpërdrejt në motin e kontinentit.
“Veçanërisht në Evropën Veriore, ne shohim një rritje të numrit të këtyre stuhive”, shpjegon Otto, duke e lidhur këtë edhe me dimra më të lagësht.
Sipas raportit, stuhitë shkaktojnë dëmin më të madh ekonomik nga çdo ngjarje ekstreme natyrore, ndërsa ekonomitë më të varfra preken në mënyrë disproporcionale më shumë se vendet e pasura të industrializuara.
Stuhitë renditen gjithashtu të tretat për sa i përket viktimave, pas tërmeteve dhe temperaturave ekstreme të nxehta ose të ftohta.
Ndërkohë, raporti nënvizon se rreziku nga fatkeqësitë nuk përcaktohet vetëm nga intensiteti fizik i një ngjarjeje, por edhe nga mënyra se si shoqëritë përgatiten dhe përshtaten përballë saj.
Përballë stuhive më intensive dhe ndryshimeve klimatike, raporti thekson rëndësinë e infrastrukturës elastike, parashikimeve më të mira, sistemeve të paralajmërimit të hershëm dhe përpjekjeve për zbutjen e ndryshimeve klimatike.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje