Gazeta Si - Gjykata e Lartë ka vendosur rikthimin në burg të shtetasit Angli Stafuka, të cilin Apeli i Shkodrës e kishte lënë të lirë, pasi u arrestua si i dyshuar për vendosjen e një sasie tritol, pranë një pallati në ndërtim në zonën e 'Ranës së Hedhun' në Shëngjin, Lezhë para thuajse dy vjetësh.
Gjykata e Lartë e ka cilësuar në shkelje proceduriale të ligjit lirimin e tij nga Gjykata e Apelit në Shkodër.
Angli Stafuka nga Fushë Kruja u arrestua pasi në bashkëpunim me Erald Pajtanin, dyshohet se kanë vendosur në një nga kolonat e një objekti në ndërtim, në pronësi të biznesmenit L.Gj., një sasi lënde plasëse, ku nga shpërthimi i së cilës u shkaktuan dëme të konsiderueshme materiale.
Objekti në ndërtim i biznesmenit u sulmua dy herë me lëndë plasëse, konkretisht në muajit nëntor dhe dhjetor të vitit 2020, ndërsa për shpërthimin e dytë ende nuk është arritur të zbulohen autoret.
Vendimi i gjykatës është ekzekutuar mëngjesin e së mërkurës, 16 shkurt, dhe i riu është arrestuar nga policia për t’u rikthyer në qeli.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.