Editorial

Shkarkohet “de facto” ministrja e Financave dhe Ekonomisë

Bordi Editorial - Sot mbahet në Bruksel Konferenca e Donatorëve për tërmetin e 26 nëntorit që organizohet nga presidentja e Komisionit Europian, Ursula von der Leyen. Por, aty kryeministri Rama ka shkuar pa ministren e Financave dhe të Ekonomisë, Anila Denaj, e cila është përgjegjëse për menaxhimin e financave publike, është përgjegjëse për të garantuar transparencën për fondet që do të mblidhen, është përgjegjëse për hartimin dhe ekzekutimin e buxhetit.

Nga të gjithë ekspertët e financave dhe ekonomisë është vlerësuar që  rezultatet e këtij eventi do të ndikojnë pazgjidhshmërisht performancën financiare dhe ekonomike të Shqipërisë të paktën në 4 vitet e ardhshme. Por, zoti Rama ka gjykuar që personi përgjegjës për ekonominë edhe financat të mos jetë pjesëmarrëse në këtë takim.

Kryeministri ka marrë me vete ministrin e Rindërtimit, z. Ahmetaj, posti i të cilit lidhet vetëm me zbatimin e planit të rindërtimit dhe funksionet e tij të ngushta në gjithë procesin e financimit, lëvrimit dhe të menaxhimit të fondeve, nuk mund të prevalojnë mbi rëndësinë e patjetërsueshme vendimarrëse të titullarit të mega Ministrisë së Financave dhe Ekonomisë.

Në fakt, ky duket një stil i njohur i z. Rama që shpesh anashkalon titullarët edhe institucionet që ato drejtojnë, për shkak të zgjedhjeve të tij personale mbi njerëzit.

I tillë është rasti për drejtimin e Komitetit të Emergjencave, i cili sipas ligjit të emergjencave duhet të drejtohej nga  zëvendëskryeministri. Jo fare pa qëllim, ligjvënësi ka vendosur që drejtimi i këtij komiteti të kryhet nga një pozicion i tillë, pasi zv/kryeministri nuk ka portofol dhe pozicioni ia lejon të koordinojë më lehtësisht punën e gjithë ministrive apo agjencive që përfshihen në planin e Emergjencës. Por, kryeministri preferoi z. Çuçi, dhe jo z. Braçe.

Kjo po ndodh me të dërguarin e posaçëm në OSBE. Një pozicion që për  herë të parë aplikohet në OSBE. Sipas protokollit të OSBE duhet të ishte Cakaj, i cili është ministër i Jashtëm në detyrë ai që do të duhet të drejtonte OSBE-në në mungesë të ministrit të Jashtëm, Edi Rama. Por siç duket njeriu që e surprizoi kryeministrin me aq shumë libra sa kishte lexuar edhe pse i zgjedhur në atë pozicion në luftë të hapur me opinionin publik, nga vetë z. Rama, po nga vetë ai nuk duket se është konsideruar i përshtatshëm profesionalisht dhe politiksht  për këtë punë.  Edhe për këtë arsye, Z. Rama ia ka besuar këtë detyrë z. Bushati, të cilin me këtë emërim i dha një mundësi profesionale, por jopolitike.

Është e qartë filozofia e kryeministrit, të drejtojë me njerëz pa eksperiencë,  pasi sipas tij eksperienca është frenues i inovacionit. Ai ka arritur të na çudisë me emra të rinj, të panjohur, të cilët nuk kanë pasur asnjë rekord të vlefshëm që të vërtetonin, qoftë aftësitë profesionale në fushat që do të drejtonin, qoftë njohuritë e nevojshme të funksionimit të institucioneve që do të drejtonin apo edhe aftësitë e tyre të lidershipit.

I ka mjaftuar besimi personal i tij, i dhënë shpeshherë në boshllëk, i cili pa dyshim është thyer shpejt.

Në këto kushte, z. Rama nuk ka nguruar t’i mbajë ‘de jure’ drejtues institucionesh, por t’i shkarkojë ‘de facto’, duke i anashkaluar ose dhe më keq, duke i zëvendësuar edhe pse janë në detyrë me emra të tjerë.

Ky është një dëm i madh që kryeministri i ka bërë piramidës shtetetërore dhe publikut, duke i shpërfaqur dy qeveri një që ngroh karrigen ‘de jure’ dhe një në hije që ‘de facto’ merr vendime.


Copyright © Gazeta “Si”


Më Shumë