.png)
Nga Gazeta Si - Dy gra, fqinje me njëra-tjetrën, janë përleshur keqazi pasi njëri prej fëmijëve e ka ofenduar tjetrën.
“Grindja ka përfunduar në komisariatin e Farkës”, thanë burimet e Gazetasi.al që treguan se si njëra prej tyre ka trokitur e nevrikosur tek komshia pasi dyshonte se e kishin spiunuar. Bëhet me dije se shtetasja me inicialet N.N ka akuzuar: “Djali yt ka bërë fotografi dhe ti ke spiunuar se unë kam lidhur ujin në mënyrë të paligjshme në rrjet”. Për këtë akuzë, policia thotë se ka ndërhyrë kryefamiljari duke e sqaruar gruan me emrin N. se familja e tyre nuk merrej me fotografi dhe as me spiunime. Por sikur mos të mjaftonte kjo, gruas i është bashkangjitur edhe i biri që e ka kërcënuar denoncuesen se “do të vras, do të fus në bagazh të makinës, do të çoj në malin me gropa ose do të shtyp me makinë”, ka paralajmëruar i riu në mbështetje të nënës dyshuese që këmbëngul se u spiunua pranë autoriteteve për një tub uji të lidhur fshehtas.
“Sikur të mos mjaftonin këto kërcënime dhe kanosje, i biri më quajti të përdalë”, është ankuar në polici 46-vjecarja.
“Më tha ‘oj e përdalë, do të var me tel korrenti’ dhe kur situata u bë kritike, im shoq telefonoi policinë”, ka deklaruar gruaja.
Bëhet me dije sipas burimeve të policisë së Farkës se teksa gruaja po komunikonte së bashku me kryefamiljarin me patrullën policore, i riu nuk është përmbajtur.
“Në prezencë të policisë nisi të më qëllojë me shkelma dhe policia e mori në rajon. Fqinjët më goditën, kanosen dhe ofenduan”, mbyll dëshminë e saj gruaja nga Lundra. Policia i thotë Gazetasi.al se i ofroi asaj ekspertizë, megjithatë ajo nuk ka pranuar.
“Dua që çështja të ndiqet me shtet, por ekspertizë nuk bëj pasi nuk kam shenja”, tha 46 vjeçarja në polici.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
