.png)
Greqia po përballet me një rritje të ndjeshme të rasteve të virusit të Nilit Perëndimor, me 110 infeksione të transmetuara brenda vendit të regjistruara deri më 12 gusht 2026. Shqetësimi i autoriteteve është shtuar pasi vetëm gjatë javës së fundit janë raportuar 45 raste të reja.
Sipas Organizatës Kombëtare të Shëndetit Publik të Greqisë (EODY), 81 prej rasteve kanë shfaqur manifestime të sistemit nervor qendror, si encefaliti, meningjiti, meningoencefaliti ose paraliza akute. Deri tani janë regjistruar edhe 9 viktima, të gjitha mbi 65 vjeç, ndërsa 35 pacientë vijojnë të jenë të shtruar në spitale, 16 prej tyre në terapi intensive.
Atika, zona më e prekur
Pjesa më e madhe e aktivitetit të virusit është përqendruar në Atikë, ku autoritetet flasin për një qarkullim veçanërisht intensiv këtë vit. Raste janë identifikuar në disa zona të Athinës dhe në Pire, ndërsa ndër bashkitë më të prekura janë Spata-Artemida, Markopoulo Mesogaias, Vari-Voula-Vouliagmeni, Pallini dhe Agia Paraskevi.
Numri real i të infektuarve mund të jetë shumë më i madh
EODY paralajmëron se shifrat zyrtare nuk pasqyrojnë domosdoshmërisht përmasën reale të përhapjes. Shumë persona të infektuar mund të kenë simptoma të lehta ose të mos shfaqin fare shenja të sëmundjes.
Autoritetet greke kanë forcuar mbikëqyrjen epidemiologjike dhe po hetojnë çdo rast të raportuar, ndërsa në zonat e prekura po intensifikohen programet për kontrollin e mushkonjave. Virusi është zbuluar gjithashtu te kuajt në disa zona, një tregues i qarkullimit të tij në mjedis.
Sipas EODY, virusi i Nilit Perëndimor është tashmë i vendosur në Greqi, pasi raste janë regjistruar në mënyrë të përsëritur gjatë viteve të fundit. Për këtë arsye, autoritetet presin raste të tjera gjatë javëve në vijim dhe u bëjnë thirrje qytetarëve të tregojnë kujdes, veçanërisht duke u mbrojtur nga pickimet e mushkonjave.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje