Zgjedhjet e 25 prillit kanë sjellë një rekord votash të pavlefshme. Nga 1.552.946 vota të numëruara deri në mesditën e 27 prillit nga Komisioni Qendror i Zgjedhjeve, 78.434 vota rezultojnë të pavlefshme. Ky trend është shënuar që me numërimin e kutive të para dhe që atëherë nuk ka ndryshuar, me numrin e votave të pavlefshme që po rritet se bashku me numrin e votave të numëruara.
Në krahasim me zgjedhjet e vitit 2017, ku vetëm 1.98 % të fletëve të votimit dolën të pavlefshme, numri i votave të pavlefshme qëndron në 5.0% të votave të hedhura në kuti rreth orës 14:00 të mesditës së 27 prillit.
Arsyeja e rritjes së numrit të fletëve të pavlefshme mund të jetë edhe fakti që këtë herë shqiptarëve iu është dashur të bëjnë dy zgjedhje në fletën e votimit, ku krahas partisë jepej pëlqimi edhe për kandidatin, gjë që ka vështirësuar procesin për shumë votues.
Me një vendim të fundit u hoq edhe emri i kandidatëve nga fleta e votimit duke lënë aty vetëm numra, gjë për të cilën u paralajmërua se do të rriste numrin e fletëve të votimit të pavlefshme.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
