.png)
Kur u tërhoq nga tenisi përkohësisht për shkak të shtatzënisë, ajo mbante numrin 1 në renditjen e Federatës Ndërkombëtare të Tenisit. Por, koha e kaluar jashtë fushave dhe larg prozhektorëve të mëdhenj të këtij sporti e zhvendosën Serena Williams në vendin e 453.
Kjo nuk e përjashton fituesen e 23 Grand Slam-eve nga pjesëmarrja në “Roland Garros”, turneu më prestigjoz i tenisit botëror, por i vështirëson rrugën që ajo duhet të ndjekë. Federata Ndërkombëtare e Tenisit thotë se do të zbatohen rregullat dhe ndarja e shorti mes sportistëve do të vendoset në bazë të renditjes së përgjithshme të tenistëve.
Çfarë do të thotë kjo për Serena Williams? Tenistja amerikane nuk do të përfshihet në grupin e tenistëve që kryesojnë renditjen, të cilave u shmanget përplasja me njëra-tjetrën. Kjo lë të hapur mundësinë që Serena të përballet ende pa mbërritur tek finalet e mëdha me rivale të forta dhe janë pikërisht këto të fundit që janë trembur më shumë.
Maria Sharapova është rivalja më e madhe e Williams. Ajo nuk e përkrah vendimin e organizatorëve.
“Tenisi është një sport egoist. E di që ekzistojnë rregullat, por bëhet fjalë për një sportiste që sapo është bërë nënë. Për mendimin tim, Serena duhet të vendosej në grupin e tenisteve që u shmangen që në fillim përplasjet e forta”, thotë ajo.
Të njëjtin mendim ka edhe Simona Halep, tenistja që aktualisht mban numrin 1 në botë.
“Mendoj që duhet të ketë një rregull që t’u mbrohet renditja në 8 vendet e para tenisteve që shkëputen përkohësisht për të lindur një fëmijë”, thotë ajo.
Serena, 36 vjeç, u rikthye pas një pushimi 14 mujorsh. Në dy turnetë që ka marrë pjesë deri më tani, Federata Botërore e Tenisit (WTA) ka aplikuar të njëjtin rregull.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
