.png)
Nga Gazeta ‘SI’- Në pritje të rikthimit të ligjshëm të basteve sportive, qeveria ka miratuar një udhëzim për mbrojtjen e lojtarëve nga varësia e lojërave të fatit. Udhëzimi i miratuar në bashkëpunim midis ministrisë së Financave dhe Shëndetësisë, synon parandalimin e varësisë, mbrojtjen e lojtarëve dhe familjeve të tyre, rritjen e ndërgjegjësimit publik dhe forcimin e përgjegjësisë së industrisë së lojërave të fatit.
Dokumenti përcakton katër programe kryesore që do të zbatohen në nivel kombëtar.
Programi i parë fokusohet në informimin, parandalimin dhe sensibilizimin. Në këtë kuadër do të krijohet një rubrikë e posaçme online në faqen e Autoritetit të Mbikëqyrjes së Lojërave të Fatit (AMLF), ku lojtarët dhe familjarët do të gjejnë informacion mbi rreziqet e varësisë, shenjat dhe pasojat, mundësinë e vetëpërjashtimit dhe shërbimet e ndihmës. Parashikohen gjithashtu spote ndërgjegjësuese në media dhe rrjete sociale, si dhe programe edukative për të rinjtë dhe shtresat vulnerabël.
Programi i dytë lidhet me trajtimin dhe këshillimin. Ai përfshin linjë telefonike dhe këshillim online, të aksesueshëm edhe në mënyrë anonime, si dhe mbështetje profesionale për lojtarët dhe familjarët e tyre. Në rast nevoje, AMLF në bashkëpunim me Ministrinë e Shëndetësisë dhe Mirëqenies Sociale (MSHMS) referon rastet për trajtim psikologjik dhe social të specializuar.
Programi i tretë synon riintegrimin social të personave që vuajnë nga varësia e lojërave të fatit. Lojtarët do të përfshihen në aktivitete sociale, profesionale, kulturore, sportive dhe artistike, të organizuara nga institucionet publike, pushteti vendor, organizatat jofitimprurëse dhe partnerë ndërkombëtarë.
Programi i katërt parashikon trajnimin e detyrueshëm të stafit të subjekteve të licencuara të lojërave të fatit, për njohjen e shenjave të varësisë, pasojave dhe mënyrave të ndërhyrjes dhe referimit për ndihmë.
Udhëzimi përcakton një mekanizëm të strukturuar për kërkesat për ndihmë. Të drejtën për të kërkuar mbështetje e kanë vetë lojtarët, familjarët, operatorët, institucionet publike ose çdo person që ka informacion për një rast varësie.
Operatorët e licencuar detyrohen të vendosin në mënyrë të dukshme në ambientet fizike dhe në platformat online informacion mbi rreziqet e lojërave të fatit, lojën e përgjegjshme, probabilitetin real të fitimit dhe shërbimet e ndihmës për varësinë.
Materialet informuese nuk duhet të nxisin pjesëmarrjen në lojë, të keqinformojnë për rrezikun e varësisë ose të krijojnë perceptime të gabuara për fitimet. Operatorët duhet të hartojnë dhe financojnë programe mbrojtëse dhe të raportojnë çdo gjashtë muaj te AMLF mbi zbatimin e tyre dhe kërkesat për ndihmë të marra.
Institucionet e kujdesit shëndetësor trajtojnë varësinë nga lojërat e fatit si çështje shëndetësore, përmes protokolleve diagnostikuese dhe trajtuese, trajnimit të stafit dhe bashkëpunimit me shërbimet sociale. Ato do të realizojnë edhe studime periodike mbi përhapjen dhe faktorët e rrezikut, duke raportuar çdo gjashtë muaj te MSHMS dhe AMLF.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje